Սեպտեմբերի 12-20-ը Բելառուսի Բրեստ քաղաքում կայացել է «Բելայա Վեժա» միջազգային թատերական փառատոնը: Փառատոնին մասնակցել են 20-ից ավելի թատերախմբեր, այդ թվում Գ.Սունդուկյանի անվան թատրոնը: Մեր թատերախումբը ներկայացել է Շեքսպիրի «Ջոն Արքա» -ով:
Թատրոնի տասը դերասանները Հայաստան են վերադարձել մրցանակով: 7 անվանակարգերից մեկին արժանացել է հենց մեր թատերախումբը` Շեքսպիրի ստեղծագործությունը օրիգինալ ներկայացնելու և ազգային թատերական ավանդույթներին հավատարիմ մնալու համար:
«Առաջին լրատվական»-ը զրուցել է «Ջոն արքա» ներկայացման մրցանակակիր, ՀՀվաստակավոր արտիստ Ալբերտ Սաֆարյանը:
-Պարոն Սաֆարյան, գրեթե բոլորը դժգոհ են մշակութային քաղաքականությունից: Որպես դերասան՝ որտե՞ղ եք տեսնում պատճառները:
-Սա շատ խորը հարց է, չեմ կարծում՝ մեկ-երկու բառով հնարավոր լինի պատասխանել: Իհարկե կան խնդիրներ, բայց ամեն ինչ արվում է, որ այդ ամենը լիարժեք դառնա, և կան խնդիրներ և՛ մեր մեջ, և՛ հանդիսատեսի: Հիշենք, որ 70 տարի մի մեծ ինստիտուտ էր աշխատում, ահռելի հզոր սովետական ինստիտուտ, որ հանդիսատեսը լինի կիրթ, թատրոն մտնելիս հասկանա՝ ինքն ուր է եկել և այլն, և այլն: Իսկ այս քսան տարիների ընթացքում, որից 10-15 տարիների ընթացքում համարյա ոչինչ չի արվել, և մի քանի տարում նորից փորձել հանդիսատեսին սովորեցնել… չէ՞ որ, նրանք, ովքեր գալիս են այսօր թատրոն, այն տարիների ծնունդ են, որ Սովետական միությունը քանդվեց, հիմա այդ մարդիկ նոր-նոր սկսում են սովորել, գալուց հետո արդեն կամաց-կամաց դառնում են այն, ինչ մենք ուզում ենք:
-Դերասանները միշտ բարձրացրել են աշխատավարձի հետ կապված խնդիրներ, սերիալներում նկարահանվելը դրանով հիմնավորել: Այսօր, երբ սերիալներ քիչ են մնացել, իսկ որակն այդպես էլ չի բարձրացել, որտե՞ղ եք Դուք Ձեզ ավելի լավ զգում:
-Ես չէի կասկածում, որ այդ հարցը կտայիք, որովհետև 4-5 տարի է՝ սերիալներում մասնակցում եմ, հիմա էլ: Պետք չէ այդքան պեսիմիստորեն մոտենալ այդ հարցին, իհարկե թատրոնում քիչ է վարձատրվում, ես կարծում եմ՝ հանրապետությունում կան շատ ավելի կարևոր խնդիրներ, բայց իհարկե չի կարելի մոռանալ հոգու խնդիրների մասին, և եթե թողնենք բարձիթողի վիճակում, կշատանա այդ սովը: Այսինքն՝ բռնել է պետք:
Ավելին՝ տեսանյութում:
