Հայաստանն ունի Եվրոպական միության հետ քաղաքական հարաբերություններ կառուցելու հնարավորություն: «Գլոբալիզացիայի և տարածաշրջանային համագործակցության» կենտրոնի և «Ֆրիդրիխ Էբերտ» հիմնադրամի նախաձեռնությամբ կազմակերպված «Եվրամիության Արևելյան գործընկերության ծրագրի ապագան ծագած խնդիրների համատեքստում, վիզաների դյուրացման և հետընդունման համաձայնագրերը՝ որպես ԵՄ-Հայաստան դրական քայլ» թեմայով քննարկման ժամանակ Հայաստանում այս մասին ասաց արևմտյան հեղինակավոր վերլուծաբան, Մարշալ հիմնադրամի Անդրատլանտյան ավագ փորձագետ, 1991-92 թվականներին Սլովակիայի արտգործնախարար Պավոլ Դեմեշը:
Նա նշեց, որ ԵՄ-ի հիմնած «Արևելյան գործընկերություն» ծրագիրն ի սկզբանե վտանգավոր ծրագիր էր, քանի որ ԱլԳ անդամ երկրներին անհնար է համարել միատարր և միասնական ինքնություն ունեցող:
«Կարո՞ղ եք արդյոք պատկերացնել, որ Հայաստանը, Ադրբեջանն ու Վրաստանը հիմնեն միասնական ռազմական ակադեմիա՝ դժվար է պատկերացնել: Կամ՝ կարո՞ղ եք արդյոք պատկերացնել, որ ԱլԳ անդամ երկրների վեց նախագահները միասին նստեն մեկ սեղանի շուրջ և երկխոսեն ԱլԳ ապագայի մասին՝ սա ևս դժվար է պատկերացնել»,- ասաց արևմտյան հեղինակավոր վերլուծաբանը՝ հավելելով, որ ծրագիրը պետք է վերանայվի՝ հաշվի առնելով աշխարհի նոր կանոններն ու միջազգային նոր հարաբերությունները և ԱլԳ երկրների առանձնահատկությունները, քանի որ այն, ինչ տեղի ունեցավ Վիլնյուսում և դրանից հետո, կարելի է որակել որպես երկրաշարժ, երկրաշարժ՝ Արևմուտքի և Ռուսաստանի միջև:
Ըստ նրա՝ սա պետք է հասկանա նաև Հայաստանը և մինչև Ռիգայում կայանալիք ԱլԳ հերթական գագաթնաժողովը պետք է հասկանա, թե ինչ է կատարվում աշխարհում: Սակայն սլովակ նախկին պաշտոնյայի կարծիքով՝ կան մի շարք կետեր, որ Հայաստանը պետք է իրականացնի: Ըստ նրա՝ անհրաժեշտ է համախմբում, նպատակների ու քաղաքականության համաձայնեցում: Սլովակ վերլուծաբանի խոսքով՝ Հայաստանը կարող է օգտվել իրավիճակից և մինչև նոյեմբերի մեկը, երբ պետք է վերջնականապես փոխվի Եվրոպական հանձնաժողովը, որը պետք է մշակի «Արևելյան գործընկերության» և Ռուսաստանի հետ հարաբերությունների նոր տեսլականը, ներկայացնի այն, ինչ ցանկանում է:
«ՀՀ իշխանությունները գիտեն, որ Հայաստանը գտնվում է աշխարհաքաղաքական երկու բևեռների միջև: Ըստ իս՝ պետք է շատ խոսել այն մասին, թե ով եք Դուք և ինչ եք ցանկանում. սա շատ կարևոր հանգամանք է: Դուք պետք է ներկայացնեք Ձեր հավակնությունները: Այս քաղաքակրթությունում ես ինձ զգում եմ՝ ինչպես տանը, բայց կան հարցեր, որոնց ուղղությամբ երկիրն ինքը իր ներսում պետք է պայքարի, ինչպիսիք են կոռուպցիան, արտագաղթը: Հավատացեք, որ այս ճանապարհին կգտնվեն ընկերներ ու աջակիցներ, բայց այս հարցերը պետք է լուծվեն երկրի ներսում»,- ասաց սլովակ հեղինակավոր վերլուծաբանը:
Ավելին տեսանյութում:
