Սեպտեմբերի 24-ին ադրբեջանցի իրավապաշտպան Լեյլա Յունուսի փաստաբան Խալիդ Բագիրովն Agence France-Presse-ին հայտնել է, որ Բաքվի հետաքննչական մեկուսարանում ծեծել են Լեյլա Յունուսին: Համապատասխան հայտարարությունն իրավապաշտպանին այցելած 5 փաստաբաններն ուղարկել են Turan գործակալությանը:
Հայտարարության մեջ ասվում է, որ «նախօրեին հետաքննչական մեկուսարանի աշխատակից մայոր Յագուբովը գնացել է բանտախուց, ոլորել է Լեյլա Յունուսի ձեռքերն ու տարել մեկ այլ՝ դատարկ բանտախուց: Այնտեղ նա նրան գցել է հատակին ու սկսել քարշ տալ մազերից»: Իրավապաշտպանը մեկուսարանի աշխատակիցների արարքը «վայրենություն» է անվանել և պահանջել է հետաքննություն կատարել: Նա նաև պահանջել է իրեն անհրաժեշտ բժշկական օգնություն տրամադրել, իսկ Կարմիր խաչի ներկայացուցիչներին խնդրել է այցելել իրեն մեկուսարանում:
Միաժամանակ, Ադրբեջանի արդարադատության նախարարությունում հերքում են Լեյլա Յունուսին կալանքի տակ պահելու որևէ խախտում և հայտարարում են, որ «նրա բանտարկության պայմանները համապատասխանում են մարդու իրավունքների բոլոր նորմերին»:
Հիշեցնենք՝ Լեյլա Յունուսն իր ամուսնու՝ Արիֆ Յունուսի հետ ձերբակալվել է հուլիսի վերջին՝ դավաճանության և հարկերի վճարումից խուսափելու կասկածանքով: Իրավապաշտպանը մեղադրվում է Հայաստանի օգտին լրտեսության համար: Նա հետաքննչական մեկուսարանում է 3 ամսով և սպասում է դատական գործընթացի սկսվելուն:
