Արմավիրի մարզի ընդհանուր իրավասության դատարանում Արթուր Ադամյանի նախագահությամբ ավարտվել է Զինա Նորոյանի (անուն-ազգանունը փոխված է) գործի դատական քննությունը:
Զինան մեղավոր է ճանաչվել ակնհայտ սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:
Ըստ մեղադրանքի՝ 26-ամյա Զինան իր եղբորն է սուտ մեղադրել ծանր հանցագործության կատարման համար:
Գիտակցելով, որ իր տրամադրած տեղեկատվությունը կեղծ է, նա հաղորդում է տվել, թե 2014 թվականի մարտի 19-ի երեկոյան եղբայրն իրենց տանը խոհանոցային դանակի սպառնալիքով իր կամքին հակառակ սեռական հարաբերություն է ունեցել իր հետ, ապա նույն օրը փորձել է նույնը կրկնել, բայց ինքը մի կերպ փախել է նրա ձեռքից:
Զինայի հաղորդման հիման վրա քրեական գործ է հարուցվել 2014 թվականի մարտի 29-ին: Զինան ճանաչվել է տուժող:
Հունիսի 26-ին արդեն հարուցվել է նոր քրեական գործ՝ սուտ մատնություն կատարելու վերաբերյալ, և Զինան մեղադրյալի կարգավիճակ է ձեռք բերել, իսկ նրա եղբայրը վերածվել է տուժողի:
Զինան վատառողջ է, նրա ձեռքն ու ոտքը պարալիզացված են, նա երկրորդ խմբի հաշմանդամ է:
Գործի քննությամբ պարզվել է, որ Զինան բնակվել է եղբոր հետ համատեղ: Վերջինս հակում է ունեցել ալկոհոլի նկատմամբ, մի քանի անգամ բուժվել է ալկոհոլամոլությունից, բայց դրական արդյունք չի եղել:
2014 թվականի մարտի կեսերին եղբայրը մի քանի օր հիվանդ պառկել է անկողնում: Նրան խնամել է քույրը՝ Զինան: Քույրը եղբոր տված գումարներով խանութից սննդամթերք ու օղի է գնել նրա համար: Ալկոհոլի ազդեցության տակ ընկնելով՝ եղբայրը պարբերաբար վիրավորել է քրոջը, անպատվել:
Զինան միջոց է փնտրել եղբոր վիրավորանքներից ազատվելու համար: Ու որոշել է հաղորդում տալ ոստիկանությունում ու միանգամից ազատվել եղբորից…
Մարտի 19-ին նա զանգահարել է իրենց գյուղի համայնքային ոստիկանին, հայտնել՝ իբր եղբայրը բռնաբարել է իրեն: Նույն օրը Զինան նույնաբովանդակ հաղորդում է տվել ոստիկանության բաժնում:
Զինան իրեն լիովին մեղավոր է ճանաչել, գործը քննվել է արագացված կարգով:
Դատարանը հաշվի է առել Զինայի անձը բնութագրող տվյալները, առողջական վիճակը:
Զինան մեղավոր է ճանաչվել, դատապարտվել 1 տարի 6 ամիս ազատազրկման: Նրա նկատմամբ պայմանական դատապարտություն է կիրառվել ու սահմանվել 1 տարի փորձաշրջան:
