Ըստ «Առավոտ»-ի՝ «Համաձայնություն» կենտրոնի ղեկավար Դավիթ Շահնազարյանը կարծում է, որ այսօր Հայաստանի դերը կարևորվում է, շահագրգռվածությունը Հայաստանի նկատմամբ ակնհայտ է: Եվրոպայի կողմից «երկակի ստանդարտների» կիրառումը Շահնազարյանը օրինաչափ համարեց: «Այսօր Հայաստանը ՌԴ-ի հետ անվտանգության համակարգի մեջ է, արդյոք այն անվտանգության համակարգում, որ մենք կանք, օբյե՞կտ ենք, թե՞ սուբյեկտ… Չեմ կարծում, թե մենք լիարժեք սուբյեկտ ենք: Ինչ վերաբերում է եվրոպական կողմնորոշմանը, ապա եվրոպական ուղղությունը արժեհամակարգ է: Այդ արժեհամակարգը Հայաստանում հաստատելուց հետո կմտածենք՝ արժե՞ անդամակցել ԵՄ-ին… ես չգիտեմ: Բայց մենք այլ ճանապարհ չունենք, քան եվրոպական արժեհամակարգի հաստատումը: Բայց դա բացառապես մեր գործն է»,- շեշտեց նա:
ԱՄՆ պետբարտուղար Հիլարի Քլինթոնը օրերս ՌԴ նախագահ Վ. Պուտինի՝ Եվրասիական միության ծրագիրը և Մաքսային միության գաղափարը ԽՍՀՄ-ը վերականգնելու միտում էր անվանել, և դրա առիթով ՌԴ իշխանությունները սուր արձագանքել էին: Դ. Շահնազարյանը այս առիթով նկատեց, որ դա անհասկանալի էր, քանի որ հենց ռուսաստանցի պաշտոնյաներն էին ամրագրել իրենց հայտարարություններում ՌԴ իշխանությունների մտադրությունները: «Եվրաուղղության և եվրասիական ուղղության քաղաքական բիսեքսուալիզմը չի կարող աշխատել»,- նկատեց Դ. Շահնազարյանը:
