Տարածաշրջանային հետազոտությունների կենտրոնը (ՏՀԿ), Հայաստանում Մեծ Բրիտանիայի դեսպանատան աջակցությամբ, անցկացրեց հանրային քննարկում՝ նվիրված վերջերս կայացած ՆԱՏՕ-ի գագաթնաժողովին՝ Հայաստանի և Հարավային Կովկասի վրա դրա ազդեցության շեշտադրմամբ։ Միջոցառմանը ելույթներով հանդես եկան Հայաստանում Մեծ Բրիտանիայի դեսպան Քեթի Լիչը, Վրաստանում ՆԱՏՕ-ի ներկայացուցչական գրասենյակի ղեկավար Ուիլյամ Լահյուն, ՀՀ Ազգային ժողովի պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը, ՏՀԿ ավագ փորձագետ Դավիթ Շահնազարյանը և ՏՀԿ տնօրեն Ռիչարդ Կիրակոսյանը։
«Քաղաքական և միջազգային հետազոտությունների հայկական կենտրոնի» փորձագետ Ռուբեն Մեհրաբյանը հիշեցրեց օրերս Եվրոպայում ՆԱՏՕ-ի միացյալ ուժերի հրամանատար Ֆիլիպ Բրիդլավի հայտարարությունն առ այն, որ առայժմ ՆԱՏՕ-ն չունի հստակ քաղաքականություն, թե ինչպես վարվել այն ժողովուրդների հետ, որոնք չեն մտնում ՆԱՏՕ-ի կազմի մեջ, բայց նաև չեն մտնում Ռուսաստանի կազմի մեջ, չկա այդ քաղաքականությունը: Փորձագետն ուշադրություն հրավիրեց նաև Ռուսաստանի ՊՆ հայտարարության վրա:
«Ռուսաստանը հայտարարում է Ղրիմում ինքնաբավ ռազմական խմբավորման ձևավորման մասին և Ռուսաստանի հարավային ռազմական օկրուգի պատասխանատվության տարածքի ընդլայնման մասին: Այսինքն՝ մենք գործ ունենք Ռուսաստանի կողմից կատարված հստակ քայլի և ՆԱՏՕ-ի բավական բարձրաստիճան գործչի կողմից այն հայտարարության հետ, որ ՆԱՏՕ-ն գոնե այս պահի դրությամբ չունի պատասխան քայլը: Կան խոսակցություններ, թե հերիք է, որ ՌԴ-ն հետքայլ անի, որ այս պատժամիջոցները վերանան, ամեն ինչ կարող է վերադառնալ նախկին վիճակին»,- ասաց Ռուբեն Մեհրաբյանը:
Նա մասնավորապես ընդգծեց. «Երբ է ձևավորվելու վերջապես այդ քաղաքականությունը: Ասում են, թե Հայաստանը պետք է որոշի. կներեք, իսկ Հայաստանը որոշում ընդունելու համար պետք է ունենա՞ տվյալներ, իսկ Ձե՞ր որոշումը որն է, Ռուսաստանի որոշումը մենք տեսնում ենք՝ որն է: Երբ է լինելու հստակություն»,- ասաց Մեհրաբյանը:
Նրա հարցին արձագանքեց ՏՀԿ ավագ փորձագետ Դավիթ Շահնազարյանը:
Առաջարկում ենք մանրամասներին ծանոթանալ տեսանյութի միջոցով:
