Չինաստանը ծրագրում է 2015 թվականից արգելել ցածրակարգ ածուխը՝ գրում է The Financial Times-ը: Թերթը նշում է, որ Պեկինի այս որոշումը կտարածվի համաշխարհային լեռնահանքային ձեռնարկությունների վրա:
Չինաստանի զարգացման և բարեփոխումների ազգային հանձնաժողովը որոշել է, որ 2015 թվականից երկրի արևելքի խիտ բնակեցված քաղաքներում կարգելվի 16%-ից ավելի մոխրի կամ 1%-ից ավելի ծծմբի պարունակությամբ ածխի այրումը: Այսպիսով երկրի իշխանությունները շարունակում են պայքարել մթնոլորտի աղտոտվածության դեմ՝ ասվում է հոդվածում:
Թերթը նշում է, որ հանձնաժողովի այս որոշումը նշանակում է ցածրակարգ ածխի ներկրման արգելք Ավստրալիայից, Աֆրիկայից և այլ երկրներից ու շրջաններից, քանի որ հենց Չինաստանի արևելյան ափամերձ տարածքի բնակիչներն են ներկրվող ածխի ամենախոշոր սպառողները: Նոր կանոնների համաձայն՝ արգելվում է 40%-ից ավել մոխիր կամ 3%-ից ավելի ծծումբ պարունակող ածխի արդյունահանումը կամ ներկրումը: Սահմանափակվում է նաև 20%-ից ավելի մոխրի կամ 1%-ից ավելի ծծմբի պարունակությամբ ածխի փոխադրումը:
