Oգոստոսի 28-ին ականի պայթյունի հետևանքով ՊՆ N զորամասում մարմնական վնասվածք ստացած լեյտենանտ Հովհաննես Կոթինյանի ոտքի մեկ երրորդն այլևս չկա, բայց լեյտենանտ Կոթինյանն իր հետ կատարվածից ընկճված չէ:
«Երբ ընտրում ես ռազմական գործը, պետք է կյանքում ամեն ինչի էլ պատրաստ լինես, քանի որ ռազմական գործում ամեն ինչ պատահում է»,- ժպիտով նշեց նա, ապա հավելեց, որ հայրենիքն իր համար մեծություն է, հայրենիքից այն կողմ իր համար ոչինչ չկա:
«Հայրենիքը, ընտանիքն ինձ համար նույն են, ամեն հայ տղամարդ իր կյանքը պետք է տա հայրենիքին, եթե անհրաժեշտ է: Այսօր մեր բանակը շատ մարտունակ է և պատրաստ ամեն ինչի, ու ոչ ոք հաստատ չի կարող մեր հայրենիքի անդորրը խանգարել, քանի դեռ դիրքերում կանգնած են ամուր տղամարդիկ, ամուր զինվորներ, հաստատ ոչ ոք չի կարող մեզ խանգարել:
Հակառակորդը թվով շատ է, բայց միշտ չէ, որ քանակը որակ է ապահովում: Եթե վախկոտ չլինեին՝ պետք է գործողություններ անեին, բայց անում են փոքր-փոքր քայլեր, այնպես որ, մեզ վախեցնել չի լինի, մենք հայ ենք, պետք է ամուր ոգի ունենանք»,- հավելեց լեյտենենատը «Առաջին լրատվական»-ի հետ զրույցում:
Մայրը՝ տիկին Աննան, որդու՝ զինվորական դառնալու ընտրությանը երբեք չի ընդդիմացել: Ուրախ է որդու համար։
«Իմ հերոս տղան ապացուցեց, որ ինքն ուժեղ է: Ուղղակի արդեն պատկերացնում էի, որ ինքը ամեն ինչի միջով պետք է անցնի, ինքը նորից ծնվեց: Առաջին դասարանից երազում էր զինվորական գործի մասին, տետրերում նկարում էր միշտ զինվոր՝ հրացանը ձեռքին: Չգիտեմ… զինվոր էի մեծացնում»,-հպարտորեն ասաց լեյտենանտի մայրը:
Ավելին՝ տեսանյութում:
