Beeline-ը Մանկական զարգացման հիմնադրամի հետ համատեղ հայտարարում են «Գիտելիք հանուն բարեկեցության» ծրագրի մեկնարկի մասին:
«Գիտելիք հանուն բարեկեցության» ծրագրի նպատակն է ներառական կրթության զարգացումը Հայաստանի մարզերում և Երևանում: Ծրագրի շրջանակում Երևանի, Արարատի ու Կոտայքի մարզերի 6 կրթական հաստատությունում կիրականացվեն ներառական կրթության զարգացմանն ուղղված ծրագրեր: Ներառական կրթությամբ զբաղվող մասնագետները կանցնեն վերապատրաստում, մասնագիտական սենյակները կզինվեն հատուկ զարգացնող խաղերով և գրականությամբ, կստեղծվեն երեխաների զարգացման Beeline անկյուններ, երեխաներին կտրամադրվեն Մանկական զարգացման հիմնադրամի կողմից արտադրված զարգացնող խաղալիքներ:
«Մենք կարևորում ենք Մանկական զարգացման հիմնադրամի հետ հաջող համագործակցությունը և հավատացած ենք, որ այս ծրագիրը նույնպես կօգնի երեխաներին փոխել իրենց կյանքը դեպի ավելի լավը: Հատուկ կարիքներով երեխաների համար համապատասխան ուսումնական պայմանների ապահովումը և ներառական կրթության որակի բարձրացումն առանցքային նշանակություն ունեն նրանց մտավոր ներուժի զարգացման համար: Սա իր հերթին ստեղծում է ինքնադրսևորման ավելի լայն հնարավորություններ երեխաների համար և նպաստում նրանց ինտեգրմանը հասարակություն», – նշեց Հայաստանում Beeline-ի Գլխավոր Տնօրեն Անդրեյ Պյատախինը:
«Ներառական կրթության ներդրման գործընթացը և զարգացումը ՀՀ կրթության ոլորտի գերակա ուղղություններից մեկն է: Մանկական զարգացման հիմնադրամը կարևորում է առանձնահատուկ կրթության պայմանների կարիք ունեցող երեխաների ներառումը և ծրագրերի միջոցով աջակցում ներառման գործընթացներին: Ներառական կրթության ներդրման այս փուլում անելիքները բազմազան են և դրանց իրականացումը մեծ ջանքեր է պահանջում: Մինչ պետական ռազմավարական ուղղությունները, համակարգերը հստակեցվեն և առաջընթաց ունենան, կարիքներ ունեցող բազմաթիվ երեխաներ չեն կարող սպասել, հատկապես մարզերում, որտեղ ռեսուրսները և ծրագրերը քիչ են: Նման ծրագրերը մասնավորապես մարզերում աջակցում են հատուկ կարիք ուենցող երեխային, նրա ընտանիքին, դպրոցին ու համայնքին: Հատկանշական է, որ մեր գործընկեր Beeline ընկերությունը կարևորում է նման ծրագրերի նախաձեռնումը և խթանում մարզերում հատուկ կարիք ուենցող երեխաների ներառման գործընթացին հասարակություն»,-ասաց Մանկական զարգացման հիմնադրամի տնօրեն Լուսինե Սիմոնյանը:
Նշենք, որ Beeline-ը համագործակցում է Մանկական զարգացման հիմնադրամի հետ 2011 թվականի ապրիլից։ Համագործակցության շրջանակում ստեղծվել է հատուկ կարիքներ ունեցող երեխաներից և հանրակրթական դպրոցներում սովորող երեխաներից բաղկացած «Մենք ենք» թատերախումբը: Թատերախմբի սաների համար անց են կացվում հատուկ միջոցառումներ և արտ–թերապիայի դասընթացներ, որոնք նպաստում են հատուկ կարիքներ ունեցող երեխաների ինտեգրմանը հասարակություն։
