Հինգերորդ գումարման Ազգային ժողովի հինգերորդ նստաշրջանում ԲՀԿ առաջնորդ Գագիկ Ծառուկյանը ամենաշատ բացակայած պատգամավորն է: ՀՅԴ խմբակցության պատգամավոր Արծվիկ Մինասյանը՝ ամենաակտիվը:
Այս մասին այսօր լրագրողների հետ հանդիպման ընթացքում տեղեկացրին «Մանդատ» հասարակական կազմակերպության փորձագիտական խմբի անդամները:
Ամփոփումը կազմվել է լրագրողական դիտարկումների, փորձագիտական վերլուծությունների և parliamentmonitoring.am կայքի վիճակագրական ծրագրի տվյալների համադրմամբ:
Ազգային ժողովի ՀԱԿ խմբակցությունը ամեաակտիվ խմբակցությունն էր այդ նստաշրջանում՝ հարցեր տալու առումով: Իշխող կուսակցության խմբակցությունը՝ Հանրապետականը, ամենաշատը «կողմ» քվեարկած խմբակցությունն է:
ՀԱԿ խմբակցության պատգամավոր Նիկոլ Փաշինյանը ամենաշատը «դեմ» քվեարկած պատգամավորն է: Ամենապասիվ խմբակցությունը «Բարգավաճ Հայաստանն» է:
Փորձագիտական խմբի անդամ Գոռ Աբրահամյանը տեղեկացրեց, որ նվազում է էթիկայի հանձնաժղովին տրվող դիմումների քանակը: Նրա խոսքով՝ այդ հանձնաժողովն աշխատել է գերպասիվությամբ:
Նստաշրջանի ընթացքում հինգ ժամանակավոր հանձնաժողով ստեղծելու առաջարկ է եղել, ընդ որում չորսը՝ փոքրամասնությունների կողմից, ընդամենը մեկն է մեծամասնությունն առաջարկել ստեղծել՝ «գազային» հանձնաժողովը, դա էլ՝ որպես փոքրամասնության մեկ այլ նմանատիպ հանձնաժողով ստեղծելու հակակշիռ:
Ասուլիսին ներկա ՀԱԿ խմբակցության քարտուղար Արամ Մանուկյանը իր գոհունակությունը հայտնեց կատարված մոնիտորինգի հետ կապված և ընդգծեց, որ ինքն էլ արել է սեփական դիտարկումները: Նա ընդգծեց, որ հանրապետական 36 պատգամավոր փող է ստանում լռելու համար. նրանք ամբողջ նստաշրջանի ընթացքում ոչ մի առաջարկով, ելույթով հանդես չեն եկել և ոչ մի հարց չեն հնչեցրել: Ըստ Մանուկյանի՝ Հանրապետականը կոճակ է աշխատում և քվեարկում այն բոլոր օրենսդրական նախաձեռնություններին, որ իրենք են բերում, և այն մեկ տոկոսը, որ իրենք դեմ են եղել, պարզապես եղել են դեմ քառյակի և ընդդիմության ներկայացուցիչներին: «Սա խոսում է ո՛չ պառլամենտարիզմի, ո՛չ օրենսդիր, և ո՛չ պատգամավոր լինելու մասին»,- ասաց պատգամավորը:
Նա միևնույն ժամանակ հայտարարեց, որ մեր խորհրդարանը երբեք այսպիսի տեսք չի ունեցել՝ երբեք իշխող կուսակցությունը միայնակ, առանց կոալիցիայի հանդես չի եկել:
Ամենաակտիվ պատգամավոր Արծվիկ Մինասյանն էլ հայտարարեց, որ այս տեսքով խորհրդարան ունենալով՝ խորհրդարանական կառավարման համակարգը կատարյալ լինել չի կարող: Մինասյանը միաժամանակ ասաց, որ Հայաստանն ունի սահմանադրական բարեփոխումների անհրաժեշտություն:
Ազգային ժողովի անկախ պատգամավոր Էդմոն Մարուքյանը ընդգծեց, որ նման մոնիթորինգ անցկացնելը շատ ողջունելի է: Այն, ըստ Մարուքյանի, թափանցիկացնում է պատգամավորի գործունեությունը:
