«Հրապարակ» թերթը գրում է. «Ազատամարտիկների նորաստեղծ դաշինքի անդամները, Արմավիր քաղաքում օգոստոսի 26-ին իրենց առաջին արտագնա նիստի ժամանակ անդրադառնալով դաշինքի ստեղծման պատճառներին, նաև նշել էին, որ դաշինքն իր առջև մի շարք խնդիրներ է դրել լուծելու, որոնք հիմնականում ուղղված են մեր պետականության և ինքնիշխանության պահպանմանն ու ամրապնդմանը, և ներկա իշխանություններին մինչև սեպտեմբերի 30-ը ժամանակ են տվել՝ կամ հեռանալ, կամ, ինչպես իրենք են ասում, խելքները գլուխները հավաքել ու աշխատել ժողովրդի համար։
Ապարանի ջոկատի հրամանատար Ռազմիկ Պետրոսյանից, ով դաշինքի նախաձեռնողներից է, հետաքրքրվեցինք, թե խոսքն ինչ ժամկետի մասին է, և ինչպես են պատկերացնում իշխանությունների հեռացումը, քանի որ հեռու չէ սեպտեմբերի 30-ը։ «Այդ ժամանակը մենք չենք տվել, ընդդիմադիր քաղաքական կուսակցություններն են տվել, իսկ մենք միանում ենք այդ հայտարարությանը։ Մենք էլ ենք ընդունում, որ այս իշխանությունները պետք է փոխվեն. կամ մարդավարի կաշխատեն մեր ժողովրդի համար, կամ կհեռանան»,- պարզաբանում է Ռազմիկ Պետրոսյանը։ Իսկ ի՞նչ միջոցներ են ձեռնարկում, ինչպե՞ս են պատրաստվում այդ հեռացմանը, հրամանատարը պատասխանեց. «Մենք անընդհատ հանդիպումներ ենք կազմակերպում մարզերում առանձին ջոկատների հետ, մեր մարտական ընկերների հետ, իրենց խնդիրներն ենք վեր հանում, նաև մեր համագործակցության հնարավորություններն ենք ճշտում։ Հիմնականում աշխատանք տարվում է այդ ուղղությամբ, մենք հզորանում ենք, համալրվում ենք, միավորվում ենք բոլոր ջոկատների հետ, որոնք պատրաստ են ծառայել մեր ժողովրդին»։
Իսկ հավանականությունը որքա՞ն է, որ նշված ժամկետում իշխանություններին հեռացնելու են կամ «խելքի բերեն», թե՞ հերթական ժամկետն է տրված, կամ անորոշ «թեժ աշունն» են հայտարարել, որն այդպես էլ չի իրականանում։ «Մինչև ամսի 30-ը իշխանություններին ժամկետ են տվել ընդդիմադիր քաղաքական ուժերը, եթե իրենք սկսեցին, միասին կլինենք, եթե իրենք չեն սկսի, մենք կկանգնենք՝ երկիրն այս վիճակից հանելու։ Մենք ևս պիտի պատրաստ լինենք, ազգը ևս պիտի պատրաստ լինի, որ պայքարի իր արժանապատիվ ապրելու համար, մենք միշտ մեր ժողովրդի կողքին ենք՝ միանշանակ»,- տեղեկացնում է Պետրոսյանը։
Մանրամասները՝ թերթի այսօրվա համարում
