1991թ. օգոստոսի 24-ին Ուկրաինայի Գերագույն ռադան ճանաչեց Ուկրաինայի անկախությունը և 1991 թվականի դեկտեմբերի 1-ին «Ուկրաինայի անկախության ակտը» դրվեց համաուկրաինական քննարկման: Օգոստոսի 24-ին Ուկրաինայում նշում են Անկախության օրը: Իսկ այսօր՝ օգոստոսի 23-ին, Ուկրաինայում նշվում է Ուկրաինայի դրոշի տոնը:
Տոնը նշելու նպատակով Հայաստանում Ուկրաինայի դեսպան Իվան Կուխտան և Հայաստանում Ուկրաինայի հայ համայնքը հավաքվել էին Երևանի Օղակաձև այգում գտնվող Տարաս Շևչենկոյի հուշարձանի մոտ:
«Առաջին լրատվական»-ի հետ զրույցում Հայաստանում Ուկրաինայի դեսպան Իվան Կուխտան շնորհավորելով աշխարհասփյուռ բոլոր ուկրաինացիներին՝ ասաց, որ այսօր Ուկրաինայի նախագահը Կիևի Սոֆիայի հրապարակում կբարձրացնի Ուկրաինայի պետական դրոշը. «Ոչ միայն Ուկրաինայում, այլև ամբողջ աշխարհում ուկրաինական սփյուռքը նշում է այս օրը: Մեզ համար հաճելի է, որ այսօր Հայաստանում գտնվող ուկրաինական սփյուռքը եկել է այստեղ նաև վաղվա՝ Անկախության օրվա կապակցությամբ միմյանց շնորհավորելու համար»:
Մեր դիտարկմանը՝ Ուկրաինան ապրել է դժվար ժամանակներ, բայց պահպանել է իր անկախությունը, և հարցին՝ ի՞նչ օրինակ պետք է վերցնեն հետխորհրդային մյուս երկրները Ուկրաինայից, դեսպանը պատասխանեց. «Ուկրաինան ոչ միայն ապրել, ցավոք սրտի, շարունակում է դժվար ժամանակներ ապրել: Այն իրադարձությունները, որ հիմա տեղի են ունենում Դոնեցկում և Լուգանսկում՝ դրանք շատ տխուր են, բայց մենք հավատում ենք, որ Ուկրաինան կա և կլինի ամբողջական, անկախ և եվրոպական պետություն: Մենք ստորագրել ենք Եվրաասոցացման համաձայնագիր, հույս ունենք նաև, որ Ուկրաինայի հարավարևելյան շրջաններում իրավիճակը ևս կկայունանա: Մենք ուզում ենք խաղաղություն, բարություն և բարգավաճում»:
Դեսպանն ընդգծեց, որ Ուկրաինան միշտ Հայաստանին դիտարկում է որպես բարեկամ երկիր. «Հիմա մենք հենվում ենք հենց տնտեսական համագործակցության վրա՝ և՛ Ուկրաինային, և՛ Հայաստանին շատ ձեռնտու է դա: Գիտենք, որ Հայաստանը Եվրասիական տնտեսական միությանն է անդամագրվելու, իսկ Ուկրաինան Եվրաասոցացման համաձայնագիր է ստորագրել, կլինեն որոշակի հարցեր, որոնք հարկ կլինի ճշգրտել, բայց մենք հետաքրքրված ենք երկկողմ հարաբերությունների լավացմամբ»:
Միևնույն ժամանակ, Իվան Կուխտան ասաց, որ Ուկրաինայում շատ մեծ հայկական սփյուռք կա, որն այսօր ակտիվ մասնակցում է Ուկրաինայի կյանքին. «Մայդանում երկու հայ է սպանվել, և դա խոսում է այն մասին, որ հայկական սփյուռքն էլ շատ ակտիվ է, հետաքրքրված է հարաբերությունների զարգացմամբ: Հայաստանում էլ Ուկրաինայի քաղաքացիներ են ապրում, որոնք աշխատում են այստեղ: Ես շնորհավորում եմ Անկախության օրվա կապակցությամբ՝ մաղթելով բարություն, խաղաղություն և բարգավաճում»:
