Սիրիայում քաղաքացիական պատերազմի զոհերի թիվը գերազանցել է 191 հազարը: ITAR-TASS-ի տեղեկացմամբ՝ այսպիսի տվյալներ են պարունակվում ՄԱԿ-ի մարդու իրավունքների հարցերով գերագույն հանձնակատարի վարչության հրապարակած վիճակագրական զեկույցում:
Այն ընդգրկում է 2011-ի մարտից, երբ հակամարտությունը սկսվել է, մինչև ընթացիկ տարվա ապրիլի վերջ ընկած ժամանակահատվածը: Միաժամանակ, ՄԱԿ-ը խոստովանում է, որ հակամարտության իրական զոհերի ստույգ թիվը կարող է ավելի մեծ լինել:
Տվյալ զեկույցը պատրաստվելիս օգտագործվել են տվյալներ 5 աղբյուրներից, ներառյալ իրավապաշտպան կազմակերպությունների և Սիրիայի կառավարության տվյալները: Վերջինը, սակայն, դադարել է նման տվյալներ տրամադրել դեռ 2012-ի մարտին:
Ցուցակում նշված 191 369 մարդուց 85,1%-ը տղամարդ են (162 900), 9,3%-ը (17 800)՝ կանայք: Հակամարտության հետևանքով զոհված անչափահաս սիրիացիների թիվը հասել է 8 800-ի, որոնցից 2 160-ը՝ 10 տարեկանից փոքր երեխաներ:
