ՄԱԿ-ի գլխավոր քարտուղար Պան Գի Մունը կոչ է արել ԱՄՆ իշխանություններին պաշտպանել քաղաքացիների խաղաղ ցույցերի և խոսքի ազատության իրավունքը՝ կապված Ֆերգյուսոնում (Միսսուրի նահանգ) 18-ամյա Մայքլ Բրաունի սպանության հետ, երկուշաբթի ճեպազրույցում հայտարարել է ՄԱԿ-ի պաշտոնական ներկայացուցիչ Ստեֆան Դուժարիկը։ Այս մասին հաղորդում է RIA Novosti-ն։
Միջադեպը տեղի է ունեցել օգոստոսի 9-ին, որից հետո քաղաքում շարունակվում են անկարգությունները, մի քանի բնակչիներ տուժել են ոստիկանության հետ բախումներում, որն ամբոխին ցրելու համար արցունքաբեր գազ և ռետինե փամփուշտներ է կիրառել։
«Գլխավոր քարտուղարը կոչ է անում իշխանություններին ապահովել, որպեսզի խաղաղ հավաքների և կարծիքներ հայտնելու ազատության իրավունքները լինեն պաշտպանված»,- ասել է Դուժարիկը։ Նրա խոսքով՝ Պան Գի Մունը նաև «կոչ է անում բոլորին հանդես բերել զսպվածություն, իսկ կարգուկանոնի պահապաններին՝ պաշտպանել ցուցարարների հետ վարվելու ամերիկյան և միջազգային ստանդարտները»։ Պան Գի Մունը, Դուժարիկի խոսքով, «հուսով է, որ տեղական և ֆեդերալ քննիչները լույս կսփռեն այդ սպանության վրա, և արդարությունը կհաղթանակի»։
