ԱՄՆ հատուկ ծառայությունները մշակում են համակարգչային ծրագիր, որն ունակ է մեխանիկական ռեժիմով՝ առանց մարդու վերահսկողության ոչ միայն լրտեսել կիբերհարձակման աղբյուրին, այլև պատասխան հարված հասցնել: Այս մասին Wired պարբերականին տված հարցազրույցում ասել է ԱՄՆ հատուկ ծառայությունների նախկին աշխատակից Էդվարդ Սնոուդենը:
Սնոուդենի խոսքերով՝ ծրագիրը ստացել է MonsterMind անվանումը: Դա գլխավորապես տարբերվում է արդեն գոյություն ունեցած ծրագրերից նրանով, որ կարող է ինքնուրույն պատասխան հարված հասցնել ցանցահենային հարձակումներին: Իսկ անհրաժեշտ վերահսկողության բացակայությունը, Սնոուդենի խոսքով, շատ վտանգավոր է, քանի որ կարող են տուժել անմեղները:
«Նման հարձակումները կարող են քողարկված լինել: Օրինակ՝ որևէ մեկը կարող է գտնվել Չինաստանում և տպավորություն ստեղծել, թե հարձակումը Ռուսաստանից է: Այդ դեպքում պատասխան հարվածը կարող է հասցվել, ասենք, Ռուսաստանի մի հիվանդանոցի: Ի՞նչ կհետևի դրան»,- ասել է Սնոուդենը:
Բացի այդ, Սնոուդենը նշել է նաև, որ ծրագիրը կարող է լուրջ սպառնալիք ստեղծել՝ ներթափանցելու մարդու անձնական կյանք: Նրա խոսքերով՝ ծրագրի իրականացման համար ԱՄՆ Ազգային անվտանգությունը պետք է գաղտնի հասանելիություն ունենա ԱՄՆ բնակիչների բոլոր կապի ալիքներին այն մարդկանց հետ, ովքեր բնակվում են արտասահմանում:
