Հայ-ադրբեջանական սահմանային լարվածության ասպեկտը քննարկվել, դիտարկվել, վերլուծվել և գնահատվել է բավական հանգամանալից, իսկ ահա այդ սահմանային լարվածության ներքաղաքական կողմը կարծեք թե մնացել է հիմնական քննարկումների լուսանցքում: Մինչդեռ բավական հետաքրքիր է հարցը, թե ինչ ազդեցություն է ունենալու սահմանային լարումը Հայաստանի ներքաղաքական կյանքի վրա:
Արդեն իսկ կարող ենք ասել, որ ազդեցության փոքր դրսևորում եղել է: Մասնավորապես, խորհրդարանական խմբակցությունները Հովիկ Աբրահամյանի դրոշի ներքո այցելել են Ղարաբաղյան դիրքեր, բացառությամբ՝ ՀԱԿԿ-ի, որը ցուցադրաբար հրաժարվել է՝ պատճառաբանելով, որ չի ցանկանում մասնակցել վարչապետի քարոզչությանը: Ըստ էության, փաստորեն ստացվում է, որ Աբրահամյանը գոնե փոքր դրվագում բաժանել է հայտնի «քառյակը», որովհետև «Ժառանգությունը», ԲՀԿ-ն ու ՀՅԴ-ն խելոք տեղավորվել են վարչապետի ուղղաթիռում: Այս փոքր դրվագը հատկանշական է ընդհանրապես քառյակի գործունեության կոնտեքստում, որտեղ ՀԱԿԿ-ն աստիճանաբար դառնում է ավելորդ և խանգարող՝ իր հավակնություններով:
Խնդիրը այն է, որ, հասնելով Տիգրան Սարգսյանի փոփոխությանը և Հովիկ Աբրահամյանի նշանակմանը, ԲՀԿ-ն ըստ էության արդեն փոխում է իր խնդիրները, և ներկայումս իշխանությունների հետ աշխատանքը ընթանում է լրիվ այլ ռեժիմով և լրիվ այլ կապերով՝ նկատի ունենալով Հովիկ Աբրահամյանի գործոնը: ՀԱԿԿ-ն այսօր հայտնվել է երկրորդ պլանում և շատ խորհրդանշական է, որ ՀԱԿԿ-ն դուրս է մնում Հովիկ Աբրահամյանի ուղղաթիռից: Սերժ Սարգսյանի հարցազրույցը ցույց տվեց, որ նա ևս պատրաստվում է օգտագործել սահմանային իրավիճակը ներքաղաքական կյանքում: Սա ակնհայտ էր ընդդիմությանն ուղղված նրա հորդորներից, որ պետք չէ ուրախացնել Ադրբեջանին: Այս հորդորի տրամաբանվածությունն ու ընդհանրապես ադեկվատությունը առանձին քննարկման նյութ է, թեև ըստ էության քննարկելու բան էլ չկա՝ եթե Հայաստանում կա մեկը, որը Ադրբեջանին ուրախացնում է իր գործունեությամբ, ապա դա իշխանական համակարգն է, իշխող ՀՀԿ-ն, որը գլխավորում է Սերժ Սարգսյանը: Սակայն փաստը, որ Սերժ Սարգսյանը հանդես է գալիս նման հորդորով, վկայում է, որ նա անկասկած մտադիր է օգտագործել իրավիճակը ներքաղաքական կյանքում: Եվ այստեղ հետաքրքրական է, որ մոտենում է աշունը, այն աշունը, որը քառյակը խոստանում էր թեժացնել:
Հարց է առաջանում՝ սահմանային իրավիճակը Սերժ Սարգսյանը կօգտագործի՞ թեժ աշնան խոստումները կամ պնդումները մարելու համար: Միևնույն ժամանակ, սահմանային լարվածությունը և պատերազմական մարտահրավերները Սերժ Սարգսյանը կփորձի օգտագործել նաև իշխանության ներսում իր համար շատ հարցեր լուծելու համար: Բացառված չէ, որ այս կոնտեքստում Սարգսյանն առկա իրադրությունը օգտագործի նաև Հովիկ Աբրահամյանի և «քառյակից» մնացած մասի հարաբերությունները վերահսկելու և կառավարելի պահելու համար:
Այսպես թե այնպես՝ ակնհայտ է, որ իրավիճակը շատ գայթակղիչ է ներքաղաքական օգտագործման համար, հատկապես Սերժ Սարգսյանի տեսանկյունից: Մյուս կողմից՝ պատեհությունը պակաս չէ նաև այսպես ասած՝ ոչ իշխանականների համար, քանի որ նրանք հիանալի պատճառ են ստանում թեժ աշնան հավաստիացումների անկատարությունը արդարացնելու համար: Համենայն դեպս ակնհայտ էր, ինչպես վարչապետի պաշտոնանկության և փոփոխության գործընթացում, որ քառյակը բացարձակապես հեռու է միասնական քիչ թե շատ լուրջ քայլի շուրջ պայմանավորվածության գալուց, և աշնանային խոստումները ոչնչով չէին տարբերվելու ապրիլյան խոստումներից: Այս դեպքում հիանալի առիթ կա արդարացնել անկենսունակությունը հանուն հայրենիքի:
