Ուրբաթ օրը մոտ 3 տասնյակ մարդիկ են հավաքվել Բերքշիրում՝ Atomic Weapons Establishment կազմակերպության համալիրի մոտ, որը զբաղվում է Trident ծովային բազայի միջուկային զենքերի համակարգի համար մարտագլխիկների մշակմամբ, արտադրության դեմ բողոքի ակցիային մասնակցելու համար: Այս մասին հայտնում է Ria Novosti-ն:
Ակցիայի մասնակիցներն ասել են, որ 29 մարդ Լոնդոնից, Նորֆոլքից, Բրեդֆորդից, Ռեդինգից, Ուելս և Կոռնոուլ շրջաններից 5 ժամ փորձել են արգելափակել համիլիրի մուտքերը՝ այնտեղ տարվող շինարարական աշխատանքներին խոչընդոտելու համար: Չնայած այստեղ ցույցեր պարբերաբար են լինում՝ ակտիվիստներին առաջին անգամ է հաջողվել արգելափակել տարածք տանող 3 հիմնական ճանապարհները:
Վերջին մի քանի ամիսներին Atomic Weapons Establishment-ի օբյեկտների շուրջ բողոքի ակցիաներն ակտիվացել են 2015-ի գարնանը նշանակված խորհրդարանական ընտրությունների մոտենալու կապակցությամբ: Այդ ընտրություններից հետո բրիտանական իշխանությունները կորոշեն Trident ծրագրի ճակատագիրը: Այդ հարցով քվեարկությունը խորհրդարանում պետք է լինի 2016թ.: Ներկայումս Atomic Weapons Establishment-ը, որը ղեկավարում է Jacobs Engineering Group, Lockheed Martin և Serco կոնսորցիումը, արդիականացում է իրականացնում, որի համար հատկացված է 2 մլրդ ֆունտ սթեռլինգ:
Բրիտանիան 225 միջուկային մարտագլխիկ ունի, Trident համակարգի շահագործումը հարկատուների համար արժենում է տարեկան 2 մլրդ ֆունտ սթեռլինգ: 2016-ին Բրիտանիան պետք է որոշի՝ հետագա 30 տարիների ընթացքում շարունակե՞լ համակարգի շահագործումը, թե՞ ոչ:
