Միացյալ Նահանգների նախագահ Բարաք Օբաման քիչ առաջ հայտնել է, որ Վաշինգտոնը նոր` սեկտորային պատժամիջոցներ է սահմանում Ռուսաստանի նկատմամբ։
«Էներգետիկա, զենք և ֆինանսներ։ Մենք արգելափակում ենք որոշակի արտադրանքի արտահանումը, ընդարձակում ենք պատժամիջոցների ցանկում ընդգրկված բանկերի և ռազմաարդյունաբերական համալիրի ընկերությունների թիվը, պաշտոնապես սառեցնում ենք դեպի Ռուսաստան էքսպորտը խրախուսող վարկերը և արգելափակում ռուսական տնտեսական զարգացմանն ուղղված ծրագրերի ֆինանսավորումը»,- ասել է ԱՄՆ ղեկավարը։
Նա հայտնել է, որ Ամերիկային է միանում Եվրոպական միությունը, որը նոր` խոշոր պատժամիջոցներ է սահմանում Ռուսաստանի նկատմամբ։ Օբամայի փոխանցմամբ, եվրոպական պատժամիջոցները վերաբերում են ռուսական ռազմական արդյունաբերությանը, էներգետիկային, տեխնոլոգիաներին և բանկերին, ինչը դժվարություններ կստեղծի ռուսների համար ապագայում նավթարդյունաբերությունը զարգացնելու հարցում։
Ըստ ամերիկյան լրատվամիջոցների, Վաշինգտոնը պատժամիջոցներ է սահմանում, մասնավորապես, «Մոսկվայի բանկի», «Ռուսաստանի ագրոբանկի» և ՎՏԲ բանկի նկատմամբ։
Բացի այդ, ըստ Օբամայի, Եվրամիությունը արգելափակում է Ռուսաստանի հետ զենքի և զինատեսակների առևտուրը։
Օբաման նշել է, որ այդ նոր պատժամիջոցներն այսօրվա դրությամբ ամենակոշտն են և «դեռ կարող են է’լ ավելի ծանր լինել»։ Նրա խոսքերով, Ռուսաստանը շարունակում է ռազմական օգնություն տրամադրել Ուկրաինայի արևելքի ռուս անջատականներին, հրետակոծում է Ուկրաինայի տարածքը, հզոր ուժեր է կուտակում Ուկրաինայի սահմանի մոտ, խոչընդոտում է մալազիական օդանավի կործանման հանգամանքները բացահայտելու գործընթացը։
Օբաման ասել է, որ ԱՄՆ-ը համակարգում է գործողությունները դաշնակիցների հետ, և հայտնեց, որ ինքը հարցը քննարկել է Մեծ Բրիտանիայի, Իտալիայի, Ավստրալիայի վարչապետերի, Ֆրանսիայի նախագահի և Գերմանիայի քանցլերի հետ։
«Պատժամիջոցները հարված են հասցնում Մոսկվային, և Ռուսաստանի առանց այն էլ թույլ տնտեսությունն է’լ ավելի է թուլանում, օտարերկրացի ներդրողներն արդեն խուսափում են Ռուսաստանից։ Ենթադրվում է, որ այս գործողությունների հետևանքով Ռուսաստանից «դրամագլխի փախուստի» ծավալը կկազմի մոտ հարյուր միլիարդ դոլար, Ռուսաստանի ռազմաարդյունաբերությունը, էներգետիկան և ֆինանսական համակարգը կզգան այդ ցավը»,- ասել է Օբաման։
Օբամայի խոսքերով, այսօր Ռուսաստանն ինքն իրեն է’լ ավելի է մեկուսացնում միջազգային համայնքից, առաջընթացի փոխարեն տասնամյակների նահանջ է գրանցում։
Օբաման ասել է, թե ԱՄՆ-ը և դաշնակիցները համոզված են, որ ուկրաինական ճգնաժամը հնարավոր է կարգավորել միայն դիվանագիտական ճանապարհով։
«Եթե Ռուսաստանը շարունակի իր այս գործողությունները, ապա վճարելիք գինն ավելի մեծ կլինի։ Այսօրվա մեր որոշումն ապացուցում է, որ մենք մեր խոսքը գործով ենք հաստատում»,- ընդգծել է Օբաման։
«Սա նոր «սառը պատերազմ» չէ, սա կոնկրետ խնդիր է, որը առնչվում է սեփական ճանապարհով շարժվելու Ուկրաինայի իրավունքը ճանաչելու Ռուսաստանի չկամությանը, այսպես չպետք է լիներ, բայց սա Ռուսաստանի և մասնավորապես [Վլադիմիր] Պուտինի ընտրությունն էր»,- ասել է Օբաման:
«Այս ճգնաժամի խաղաղ լուծումը ենթադրում է Ուկրաինայի ինքնիշխանության, տարածքային ամբողջականության և Ուկրաինայի ժողովրդի անկախության ճանաչում»,- հայտարարել է ԱՄՆ-ի ղեկավարը։
