Այսօր ԱԺ նիստում Մաքսային օրենսգրքում փոփոխությունների քննարկման ժամանակ պատգամավոր Էդմոն Մարուքյանը հետաքրքրվեց՝ եթե ԱՊՀ շրջանակներում ապրանքների ծածկագրերի մասով փոփոխություններ չլինեին, կառավարությունը չէ՞ր անդրադառնալու մաքսային խնդիրներին:
«Մեզ շատ լավ հայտնի է, թե ինչ խնդիրներ մենք ունենք, բազմաթիվ բողոքներ ունենք` մաքսային խնդիրների հետ կապված»,- նշեց Է. Մարուքյանը:
Ֆինանսների փոխնախարար Սուրեն Կարայանը նշեց, որ փոփոխություններով 3 հիմնական խնդիր է լուծվում՝ կանոնների հստակեցում և պարզեցում, տուգանքների ինստիտուտի նոր ամրագրում և ԱՊՀ դասակարգչի հարցը. «Դուք առաջինը տեսաք վերջինը: Առաջին երկու հարցը ԱՊՀ դասակարգչի հետ կապ չունեն»:
ՀՀԿ-ական պատգամավոր Խոսրով Հարությունյանի խոսքով՝ պետք է ներկրողին զերծ պահել մաքսայինի հին մեթոդներից, բայց փոփոխությունները չեն ձերբազատում դրանցից, թեև հստակեցնում են ձեռք բերման գնի պահը:
Ի պատասխան` Ս. Կարայանն ասաց, որ փոփոխությունները հիմնականում վերաբերում են ձեռք բերման գնին, թեև մնացած մեթոդները նույնպես կիրառելի են, եթե ներկրողը չի ապահովում 87-րդ հոդվածով պահանջվող փաստաթղթերը. «Հիմնական առավելությունն այն է, որ գրավոր հիմնավորման պահանջ է դրվում մաքսային մարմնին»:
«Նպատակը դրական է, բայց իրականացման ձևը, մեթոդը, խորությունը չեն համապատասխանում նպատակին»,- հայտարարեց ՀՅԴ պատգամավոր Արծվիկ Մինասյանը՝ առաջարկելով արագընթաց կարգով ստեղծել աշխատանքային խմբի պես մի բան` փոփոխությունները կատարելու և կյանքի կոչելու համար, որպեսզի հետագայում այս փոփոխությունների հետ կապված բողոքներ չստացվեն:
