Azatutyun.am-ի փոխանցմամբ վարչապետ Հովիկ Աբրահամյանն այսօր Գյումրի կատարած աշխատանքային այցի ժամանակ հայտարարել է, թե խոշոր գործարարներին ստվերից դուրս բերելու իր ջանքերն արդեն արդյունք են տվել։ Հիշեցնենք, որ մայիսին կառավարության նիստի ժամանակ Աբրահամյանը խոշոր գործարարներին մինչև հուլիսի 1-ը ժամանակ էր տվել՝ կա՛մ նրանք սեփական ցանկությամբ կսկսեն աշխատել հավասար դաշտում և դուրս կգան ստվերից, կա՛մ այդ նպատակին հասնելու համար կառավարությունը կօգտագործի իր լծակները:
«Թող նորմալ աշխատեն հարկային դաշտում և գիշերները հանգիստ քնեն»,- այսօր հայտարարել է Հովիկ Աբրահամյանը․ – «Եթե դուք հետևում եք՝ մեր քայլերը տվել են իրենց արդյունքը: Այսօր ես հեռուստացույցով լսում էի, որ հարկային մարմինները ներկայացնում էին, որ քանի տեղ ստուգումներ են կատարվել՝ որտեղ նկատել են ռիսկեր, և ակնհայտ թղթաշրջանառությունը երևում է դրական շարժը: Եվ դա շատ կարևոր է մեզ՝ հունիսի 1-ից 10-ը մոտ 105 հազար հաշիվ ֆակտուրաների քանակ է ավելացել: Եվ շրջանառությունը՝ հունիսի 1 – հունիսի 10, հուլիսի 1 – հուլիսի 10, մոտ 24 միլիարդով ավելացել է: Դա, իմ կարծիքով, ձեռքբերում է, և համոզված եմ, որ պատասխանատու մարմինները շատ նորմալ աշխատում են, կլինեն հետևողական, ես ինքս էլ կլինեմ հետևողական, և մենք այդ գործընթացը միշտ շարունակելու ենք: Ունենալու է շարունակական բնույթ, և դա նաև բխում է մեր գործարարների շահերից»:
Հ.Աբրահամյանն անդրադարձել է նաև Եվրասիական տնտեսական միությանը Հայաստանի անդամակցության ձգձգմանը: Նա կրկին վստահեցրեց, թե մինչև այս տարվա հոկտեմբերի վերջ կստորագրեն համաձայնագիրը, իսկ 2015 թվականի հունվարից Հայաստանը կանդամակցի Եվրասիական տնտեսական միությանը: Վարչապետը հավաստիացրել է, թե որևէ խնդիր, այդ թվում՝ Ղարաբաղի հետ կապված գոյություն չունի:
«Որևէ պատճառ չկա՝ ինչպես դուք նշեցիք՝ Ղարաբաղի հետ կապված խնդիրներ, որևէ այլ խնդիր չկար, և ուղղակի քննարկվում են, կան հարցեր տեխնիկական, որ վերացվում են, որ արդեն վերացվել են: Օրինակ, այսօր ժամը 18:00-ին աշխատանքային խումբը վերադարձել է, ինձ մոտ լինելու է քննարկում: Ուղղակի ես ուզում եմ ևս մեկ անգամ հաստատենք, որ մենք կավարտենք հոկտեմբերի մեջ և 2015 թվականի հունվարի 1-ից մենք կլինենք լիիրավ անդամ», – նշել է նա:
Ամբողջությամբ՝ սկզբնաղբյուր կայքում:
