Վելինգտոնում տեղի է ունենում ամենամեծ գովազդային արշավը, որ երբևէ կազմակերպել էր Նոր Զելանդիան ու երբևէ իր ֆիլմերի համար պատրաստել էր Փիթեր Ջեքսոնը:
Պրեմիերայից երկու օր առաջ մամուլի ու ֆիլմի նկարահանող խմբի համար տեղի էր ունեցել ֆիլմի փակ ցուցադրությունը: Ներկայում այն դիտելու հնարավորություն ունեն քաղաքացիները: Շուրջ 100 հազար մարդ է երեկ մասնակցել Նոր Զելանդիայի մայրաքաղաք Վելինգտոնում «Հոբիթի» պրեմիերային: Այս մասին տեղեկացնում է BBC-ի ռուսական ծառայությունը:
Ռեժիսոր Փիթեր Ջեքսոնի հայտնի ֆիլմը «Մատանիների տիրակալը» եռագրության պրիկվելն է: «Հոբիթի» հիմքում ընկած է գրող Ջոն Տոլկիենի՝ 1936թ. գրված վեպը:
Ֆիլմի պրեմիերային մասնակցել են ռեժիսորը, գլխավոր հերոսներին մարմնավորած դերասանները, նաև հյուրեր, որոնց թվում է եղել ռեժիսոր Ջեյմս Քեմերոնը:
Ելույթ ունենալով ֆիլմի ցուցադրումից առաջ՝ Ջեքսոնը ավելի քան 10 րոպե է տրամադրել դերասաններին ներկայացնելուն և թվարկմանը, թե ում է շնորհակալ ֆիլմի վրա կատարած աշխատանքի համար:
«Սա ինձ համար անհավանական փորձ էր: Երբ ֆիլմ ես ստեղծում, փորձում ես կենտրոնանալ դրա վրա ու բոլոր կողմնակի մարդկանց հեռու պահել նկարահանման հրապարակից: Դու ուզում ես, որ ամեն ինչ լինի թաքուն, շատ անձնական: Իսկ հետո ֆիլմը պատրաստ է, ու մի հրաշալի առավոտ այն հայտնվում է հարյուր- հազարավոր մարդկանց շրջանում, որոնք ժամանել են, որ դա տոնեն քեզ հետ»,- ասել է ֆիլմի ռեժիսորը:
