«ՀՀ քաղաքացիներին ծաղրելը վարչապետ Տիգրան Սարգսյանի համար կարծես թե կենսակերպ է դարձել, սիրած զբաղմունք, հոբբի, և նա հաճույք է ստանում մարդկանց հասցեին ցինիկ արտահայտություններ անելուց»,- գրում է «Ժողովուրդ»-ը և հավելում.
«Հերթական «զգլխիչ» հայտարարության առիթը կենսաթոշակառուներն էին: «ՀՀ յուրաքանչյուր աշխատող քաղաքացի պետության հետ միասին պատասխանատվություն է կրում իր բարեկեցիկ կենսաթոշակային տարիքի համար,-ասել է նա ու հավելել,- դա ոչ միայն պետության, այլև յուրաքանչյուր աշխատող քաղաքացու պարտավորությունն է` մտածել բարեկեցիկ ծերության մասին»: Փաստորեն, հերթական անգամ Տ. Սարգսյանը պատասխանատվությունը գցում է իր վրայից:
Վարչապետի ասածը տրամաբանական կլիներ, եթե իր եղբոր նման 3.5 մլն դրամ աշխատավարձ ստանային: Բայց այսօր ՀՀ քաղաքացիները ծիծաղելի աշխատավարձ են ստանում և գոյատևում չքավորության պայմաններում: Էլ ինչպե՞ս մտածեն իրենց ապագայի, կենսաթոշակային տարիքի մասին»:
