Տավուշի մարզի Մովսես գյուղ կատարած այցելության ժամանակ գյուղացիների հետ հանդիպմանը ՀՀ վարչապետ Հովիկ Աբրահամյանը խոստացավ մեկ մլն դրամ իր հիմնադրամից փոխանցել գյուղացիների գազի տարեկան սպասարկման վարձը փակելու համար:
«Ես իմ ֆոնդից մեկ միլիոն դրամ կփոխանցեմ գյուղապետարանին, որ գյուղապետը փակի գազի տարեկան սպասարկման վարձերը»,- ասաց նա:
Գյուղացիներից մեկը այդ պահին դիմեց գյուղապետին՝ ասելով. «Եթե դուք վիզ եք վեր ունում, որ այդ փողը տաք»: Գյուղապետն էլ արձագանքեց. «Ես չեմ վիզ վեր ունում, պարոն վարչապետն ա խոստանում»: Իսկ Հովիկ Աբրահամյանն էլ արձագանքեց. «Ես եմ վիզ վեր ունում: Էս մարդն իմ վզի հնարավորությունները չգիտի, միայն գյուղապետի վզի հնարավորությունները գիտի: Դու իմ վզի վրա հույս դիր»:
Գյուղացիներից մեկը բողոքեց՝ ասելով. «Անընդհատ լսում ենք, որ արտոնությունները Իջևանի գյուղերին են տալիս, այգի են ստեղծում, կոլտնտեսություններ են ստեղծում, անասուններ են բերում: Ինչո՞ւ մարզպետի մոտ Շամշադինից մի տեղակալ չկա, որ նա էլ մի օգուտ Շամշադինին տա»: Ի պատասխան՝ Հովիկ Աբրահամյանն ասաց. «Երբ մեքենայով գալիս էինք, մարզպետի հետ խոսեցինք փոխմարզպետների մասին: Ասաց, որ մի փոխմարզպետի ազատ տեղ կա, ուզում եմ Բերդից տանեմ: Դե, ընտրեք մի գրագետ, խելացի երիտասարդի, նշանակենք փոխմարզպետ»:
Վարչապետը, ամփոփելով գյուղացիների հետ խոսակցությունը, թվարկեց, թե ինչ պայմանավորվածություններ են ձեռք բերել. «Կոմբայնի հարցը լուծեցինք, դեռ մի ամիս կտևի մինչև Ռոստովից գա, ջրագծի մասին պայմանավորվեցինք, որ նախագիծ անենք, տեսնենք՝ ինչ կարժենա, ու կասենք՝ երբ ենք սկսում, երբ ենք ավարտում: Ուսանողների վարձավճարների փոխհատուցում կանենք: Մեկ էլ ձեր առաջարկը, որ լինենք հանդուրժող ու համերաշխ»:
Անդրադառնալով Մովսես գյուղի ասֆալտապատման հարցին՝ Հովիկ Աբրահամյանն ասաց, որ կմտածեն այդ մասին: Հարցին, թե Խնայդրամարկղի գումարները ե՞րբ են վերադարձնելու, նա պատասխանեց, որ կփորձեն սահմանամերձ գյուղերի հերթն առաջ գցել:
Գյուղացիներից մեկի դիտարկմանը՝ ընտանեկան նպաստները մի ամիս տալիս են, հետո կտրում, վարչապետն արձագանքեց. «Նման բան չի կարող լինել: Չափանիշներ են դրված, դրանցից դուրս չեն կարող գալ»: