Թուրքական Hürriyet թերթն անդրադարձել է Լիբիայում ընթացող պատերազմական գործողություններին` զուգահեռներ անցկացնելով դրանց և Բահրեյնում ու Եմենում տեղի ունեցած իրադարձությունների միջև.
«Ներկայումս ԱՄՆ-ը իր եվրոպական դաշնակիցների հետ հարձակվել է Լիբիայի վրա: Բահրեյնում ու Եմենում նույնպես տեղի ունեցան քաղաքացիական ցույցեր, և ցուցարարների հանդեպ բռնություններ գործադրվեցին, ինչի հետևանքով զոհվեցին տասնյակ անձինք: Չնայած դրան` Բահրեյնի ու Եմենի նկատմամբ Արևմուտքի արձագանքները վերածվեցին պարզապես դատարկ խոսքերի:
Այս թեմայի շուրջ մի շարք նյութեր են տպագրվել BBC և New York Times թերթերում, որոնցում փորձագետներն առաջին հերթին ուշադրություն են հրավիրում այն հանգամանքի վրա, որ Բահրեյնն ու Եմենը ԱՄՆ դաշնակիցներն են: Մերձավոր Արևելքում ապստամբություններ բարձրացնելիս ԱՄՆ-ն անհատական մոտեցում է ցուցաբերում յուրաքանչյուր երկրի հանդեպ:
Իրանն անհանգստացած է 70-տոկոսանոց շիա բնակչություն ունեցող Բահրեյնում տեղի ունեցած ցույցերից, քանի որ Բահրեյնը Պարսից ծոցի տարածաշրջանից նավթի փոխադրման պլանում ծառայում է որպես «բազա», և ԱՄՆ-ը գաղտնի աջակցում է այնտեղ ծավալված ապստամբական շարժմանը:
Եմենն իր հերթին ԱՄՆ-ի համար մեծ կարևորություն է ներկայացնում ահաբեկչական «Ալ-Քաիդա» կազմակերպության դեմ պայքարի տեսանկյունից: Չպետք է մոռանալ, որ Աֆղանստանից հետո «Ալ-Քաիդա»-ի գործունեության երկրորդ ակտիվ գոտին Եմենն է: Հենց այդ պատճառով էլ ԱՄՆ նախագահ Բարաք Օբաման սահմանափակվեց Եմենում զոհված 40 ցուցարարների սպանությունը միայն դատապարտելով»:
Հիշեցնենք, որ օրեր առաջ ամերիկյան Stratfor վերլուծական կենտրոնի փորձագետները նշեցին, որ պաշտոնական Թեհրանը Հյուսիսային Աֆրիկայում առաջացած անկայուն իրավիճակի ժամանակ փորձում է իր նպատակներին ծառայեցնել Պարսից ծոցի երկրներում ժողովրդական զանգվածների դժգոհությունը.
«Իրանի հիմնական թիրախներն են Քուվեյթը, Բահրեյնը և Սաուդյան Արաբիան, ուր առկա է մեծաթիվ շիայական բնակչություն, և որտեղ կենտրոնացած են ամերիկյան զորքերը: Հենց այդ պատճառով էլ Բահրեյնում իրավիճակը շարունակում է մնալ լարված, ինչը շատ կարևոր է, քանի որ Բահրեյնը հանդիսանում է ողջ տարածաշրջանի բանալին:
Եթե Իրանին հաջողվի լրջորեն ապակայունացնել իրավիճակը այդ երկրում, ապա դա կարող է դոմինոյի էֆեկտ ունենալ: Իսկ դա էլ կհամընկնի տարածաշրջանից ամերիկյան զորքերի մեծ մասի դուրսբերմանը, ինչը մեծապես կվնասի սուննի արաբական երկրներին»:
