Իսլամական ՀԱՄԱՍ շարժման քաղբյուրոյի ղեկավար Հալեդ Մաշալը հայտարարել է, որ Իրանը Գազայում պաղեստինյան դիմադրությանը զենք է մատակարարել:
«Պաղեստինյան հակամարտության զենքը մասնակի արտադրվել է հենց Գազայում, մնացածը մատակարարել են այլ երկրներ, այդ թվում՝ Իրանը»,- հաղորդել է Մաշաալը Կահիրեում տեղի ունեցած մամլո ասուլիսի ժամանակ՝ Իսրայելի հետ համաձայնության գալու վերաբերյալ հայտարարությունից հետո:
Չորեքշաբթի երեկոյան Եգիպտոսի արտգործնախարար Մուհամեդ Ամրը ԱՄՆ պետքարտուղար Հիլարի Քլինթոնի ներկայությամբ հայտարարել է, որ Իսրայելն ու ՀԱՄԱՍ-ը կարողացել են համաձայնության գալ հաշտության վերաբերյալ, որը ուժի մեջ է մտել երևանյան ժամանակով 23:00-ին:
Ըստ ՀԱՄԱՍ-ի քաղբյուրոյի ղեկավարի՝ Թեհրանը ՀԱՄԱՍ-ին աջակցել է զենքով, չնայած Սիրիայի հարցում նրանց ունեցած տարաձայնություններին:
Մաշաալը հայտնել է, որ ներկա դրությամբ պաղեստինցիների գլխավոր խնդիրը նրանց շարքերի և ղեկավար կառույցների միավորումն է:
Նրա խոսքերով՝ պաղեստինցիներին անհրաժեշտ է սկսել համազգային քաղաքական ծրագրի իրականացումը, որը հիմնված է ժողովրդի միասնականության և այնպիսի սկզբունքների վրա, ինչպիսիք են՝ փախստականների վերադարձը իրենց տարածքներ և Երուսաղեմի կարգավիճակի որոշումը:
