Չինաստանի հարավ-արևելյան Ֆունցզյան նահանգի Ֆուան քաղաքում ճանապարհային պատահարը անկարգությունների պատճառ է դարձել, հաղորդում է Associated Press գործակալությունը:
Ականատեսների խոսքով՝ շաբաթ երեկոյան ոստիկանությունը կանգնեցրել է Ֆուանի ավտոմայրուղիներից մեկով երթևեկող վարորդներին ու ստուգել է ալհոհոլի պարունակությունը նրանց արտաշնչած օդում:
Վարորդներից մեկը փորձել է խուսափել ստուգումից ու որոշել է թաքնվել: Դա հանգեցրել է հետապնդման, ինչի հետևանքով մեքենան բախվել է 3 մոտոցիկլետի ու մեկ այլ ավտոմեքենայի, տուժել է 5 մարդ:
Ըստ ականատեսների՝ անկարգությունների տեղիք է տվել այն հանգամանքը, որ շտապօգնությունն ու ոստիկաննները դեպքի վայր կարողացել են հասնել 1 ժամում:
Դեպքի վայրում հավաքվել է շուրջ 20 հազար անցորդ, որոնցից 2000-ը մասնակցել են անկարգություններին, պնդում են ականատեսները:
Հաղորդվում է, որ անկարգության մասնակիցները շրջել են առնվազն 3 ավտոմեքենա:
Նախնական հետաքննությունը պարզել է, որ ոստիկաններից փախչողը չի ունեցել վարորդական իրավունք, սակայն ալկոհոլի ազդեցության տակ չի եղել:
Ոստիկանությունից հաղորդել են, որ տուժածներից 4-ը հոսպիտալացվել են ու գտնվում են կայուն վիճակում, հինգերորդին արդեն ուղարկել են տուն:
