Ազատամարտիկ, քաղաքական գործիչ Սմբատ Այվազյանի մահով հայ ժողովուրդը մեծ կորուստ կրեց: «Առաջին լրատվական»-ի հետ զրույցում նման տեսակետ հայտնեց Հանրապետություն կուսակցության նախագահ Արամ Սարգսյանը: «Շատ-շատ տխուր է և դժվար նման կենսախինդ, կյանքը սիրող, կյանքի ամեն վայրկյանը հաճույքով ու պայքարով ապրող Սմբատ Այվազյանի մասին անցյալով խոսելը: Մեր հայ հասարակությունը, հայ ժողովուրդը խորապես համոզված է, որ շատ մեծ կորուստ կրեց: Պետության, պետականության ակունքներում կանգնած մարդ, որը կոմպրոմիսի չգնաց իր խղճի հետ, կարողացավ լռել, բայց իր տեսակետը միշտ ասել, չփոխեց իր տեսակետները, չփոխեց իր ձևը»,- ասաց նա:
Սարգսյանը նշեց, որ խոսում է իր համար հարազատ մարդու, մեծ եղբոր ընկերոջ մասին, ում հետ ինը-տասը տարվա դժվարին ճանապարհ է անցել, ով նաև իր լավ ընկերն է, ում հետ 1999 – 2000 թվականից տասնչորս տարի ճանապարհ է անցել` թե Հայաստանի ներսում, թե Հայաստանից դուրս, և չէր ասի, թե պատերազմի տարիներից հեշտ, որոշ դեպքերում շատ ավելի դժվար և ծանր որոշումներ կայացնելու ճանապարհ:
«Ես հպարտ եմ, որ Սմբատի պես ընկեր եմ ունեցել: Համոզված եմ, որ ինքը գնաց հավերժի գիրկը, ինքը կմնա մեր հիշողությունների մեջ, և հակված եմ ամեն ինչ անելու, որ այն նպատակներն ու ցանկությունները, ինչ մենք միասին ունեինք, աշխատենք իրականություն դարձնել»,- ասաց նա: