Ռուսաստանի Քննչական կոմիտեում հերքել են Վրաստանի նախկին նախագահ Միխեիլ Սաակաշվիլիի նլկատմամբ հետախուզում հայտարարելու մտադրության մասին լուրը: Այս մասին հայտնում է Ria Novosti-ն՝ հղում անելով գերատեսչության պաշտոնական ներկայացուցիչ Վլադիմիր Մարկինի հայտարարությանը:
Նրա խոսքով՝ պետությունների բոլոր, այդ թվում՝ նախկին ղեկավարներն իմունիտետ ունեն: Այդպիսով, 2008 թվականին Հարավային Օսիայում տեղի ունեցած իրադարձությունների գործով միջազգային հետախուզում կարող է հայտարարվել վրացի այլ պաշտոնատար անձանց նկատմամբ՝ նշել է Մարկինը:
Ավելի վաղ՝ հունիսի 9-ին մի շարք ԶԼՄ-ներ տեղեկություն տարածեցին, որ Սաակաշվիլիի և նրան մոտ մի քանի պաշտոնյաների նկատմամբ կարող է հետախուզում հայտարարվել 2008 թվականի իրադարձությունների պատճառով: Մասնավորապես՝ այս մասին հայտնել էր ITAR-TASS-ը՝ հղում անելով Մարկինին: Նա հայտարարել էր, որ Գլխավոր դատախազություն Սաակաշվիլիի չներկայանալու դեպքում նրա նկատմամբ հետախուզում կհայտարարվի:
Հիշեցնենք՝ 2008 թվականի օգոստոսի 8-ի գիշերը վրացի զինվորները գրոհեցին ինքնահռչակ Հարավային Օսիայի տարածքի վրա: Օսերի կողմից հանդես էին գալիս ռուս զորքերը, որոնք 5 օրվա ընթացքում վրաց զորքը դուրս բերեցին, իսկ օգոստոսի 26-ին Ռուսաստանը ճանաչեց Աբխազիայի և Հարավային Օսիայի անկախությունը:
