Հայաստանի արտաքին պարտքը մոտենում է հինգ միլիարդ դոլարի սահմանագծին, 4.5 մլրդի սահմանը վաղուց անցել է: Հունիսի 9-ին ԱԺ-ում ՀՀ և Եվրոպական ներդրումային բանկի միջև 2013-ի նոյեմբերի 7-ին և 2013-ի նոյեմբերի 18-ին ստորագրված «ՀՀ «Հյուսիս- Հարավ» ճանապարհային միջանցք» ֆինանսական պայմանագրի քննարկման ժամանակ այս մասին նշեց ԱԺ ԲՀԿ խմբակցության քարտուղար Նաիրա Զոհրաբյանը: Նրա խոսքով՝ տպավորությունն այնպիսին է, որ փորձում ենք ստախանովյան տեմպերով այն հասցնել հինգ միլիարդի:
«Եթե տրամաբանությունն այն է, որ որտեղ 4.5 –ը, այնտեղ 5-ը, դա էլ է տրամաբանություն, արժի քննարկել: Եթե 5 մլրդը շատ ավելի բարեհունչ է, դրա համար ենք ձգտում ավելացնել Հայաստանի արտաքին բեռը, դա էլ քննարկելու հարց է: Այս՝ «Հյուսիս-Հարավ» ճանապարհին հատկացված վարկային միջոցների արդյունավետության մասին, եթե հիշում եք, Վերահսկիչ պալատին ներկայացրեց բավական հետաքրքիր, կիսաաղմկահարույց տվյալներ, ներկայացրեց վստահաբար փաստերի մի չնչին մասը՝ հերթական անգամ քաղաքական գործընթացին խառնվելու մեղադրանքներ չվաստակելու համար, բայց մամուլում տարբեր մասնագետների և վերլուծաբանների կողմից բազմաթիվ փաստեր և հրապարակումներ եղան՝ ատկատների փառահեղ մեխանիզմների հետ կապված»,- ասաց նա:
Զոհրաբյանը նշեց, որ առաջիկայում առաջարկով են հանդես գալու՝ մինչև նոր հարկային բեռ, պարտավորություն ստանձնելը խորհրդարանում հաշետվություն ներկայացվի մինչ այժմ ծախսված որոշ՝ առավել վիճահարույց վարկերի արդյունավետության վերաբերյալ: ԲՀԿ քարտուղարը նշեց, որ իրենք պատկան կառույցներին կդիմեն՝ հրավիրելով խորհրդարան:
