Ազատամարտիկները վստահ են՝ պատերազմի դեպքում Հայաստանն անկասկած կհաղթի: Եթե հակառակորդը գնա այդ քայլին և հարձակվի, մի քանի օրվա մեջ կջախջախեն թշնամու զորքը:
«Առաջին լրատվական»-ի հետ զրույցում «Արաբո» ջոկատի հրամանատար Մանվել Եղիազարյանը տեսակետ հայտնեց, թե Ադրբեջանը միշտ էլ նույն ձեռագրով, նույն ձևով՝ կամաց-կամաց, գողտրիկ գալիս-սպանում է գյուղացուն, հովվին. «Իրենց հիմիկվա արածն էլ նույն ձեռագրով է, տարիներ առաջ էլ այդպես կացնահարեցին Գուրգեն Մարգարյանին: Նրանք այն պոտենցիալը չունեն, որ հաղթեն պատերազմում, քանի որ բնակչությամբ միատարր չեն. այդպիսի բանակը լավ կռվել չի կարող»:
Միևնույն ժամանակ հրամանատարն ասաց, որ սա չի նշանակում, թե պետք է ձեռքները ծալած նստենք ու սպասենք, թե ինչպես են կոտորում մեր երեխաներին՝ կան դեպքեր, որ, ըստ Եղիազարյանի, պետք է հակահարված տալ:
«Տիգրան Մեծ» գնդի հրամանատար Վլադիմիր Առաքելյանի խոսքով՝ պատահական չէ, որ այսօր Ադրբեջանն իրեն լկտի է պահում. «Հայաստանը, ՀՀ իշխանությունները բերել-հասցրել են մի կետի ու վարում են պարտվողական արտաքին քաղաքականություն: Աշխարհում չենք տեսել մի հաղթած ժողովուրդ, որ այսպիսի պարտվողական քաղաքականություն վարի: Եթե այսօրվա իշխանությունը չի գիտակցում, որ ինքը պետք է վերջ տա այս քաղաքականությանը, մենք՝ այն տղաներով, որոնցով հաղթեցինք, այսօր էլ ենք պատրաստ: Բայց կոչ կանենք ՀՀ իշխանություններին, որ խելքները գլուխները հավաքեն»:
Ազատամարտիկ Ռուստամ Ղազարյանի («Արաբո» ջոկատ) կարծիքով՝ պետք է կազմակերպել 88-ի ոգին և հնարավորություն տալ հրամանատարներին գալ ու լինել երկրի տերը. «Ինչպես կռվի ժամանակ կազմակերպեցին, ու հաղթեցինք, հիմա էլ գան, կազմակերպեն, ու կհաղթենք: Իսկ այս կրակոցները լուրջ չեմ համարում, նենգ՝ իրենց նման, դիմաց-դիմաց չեն գա կռվելու»։
Հետաքրքրվեցինք նաև, թե հնարավոր պատերազմի դեպքում պատրա՞ստ են մի կողմ դնել ՀՀ իշխանությունների հետ տարաձայնությունները և կռվել: Ի պատասխան՝ հրամանատար Եղիազարյանն ասաց. «Ազգի ուժը, անմահությունը այն ժամանակ է երևում, երբ մոռանում ես ցավը, որ քեզ պատճառել է այս կամ այն իշխանավորը: Իմ որդին էլ է այսօր ճակատագիր փնտրում արտասահմանում, բայց դա չի նշանակում, որ ես հանգիստ կարող եմ նստել ու նայել՝ ինչպես են ավերում հայկական գյուղերը: Ես անձամբ ամեն ինչ թողնելու եմ մի կողմ՝ գնամ մարտադաշտ: Հետո, երբ կարիքը լինի, այդ մարդիկ պատասխան կտան, որ երկիրն այս օրին են գցել»:
Նույն հարցին անդրադարձավ հրամանատար Առաքելյանը՝ ասելով. «Աստված չանի, որ պատերազմ լինի, բայց մինչև դրա լինելը՝ ՀՀ իշխանություններին կոչ եմ անում վերջ տալ այս կեղտոտ խաղերին և մոբիլիզացնել ժողովրդին: Ամեն րոպե պետք է պատրաստ լինենք»:
Առավել մանրամասն՝ տեսանյութում:
