Ջերմուկի գործող քաղաքապետ Վարդան Հովհաննիսյանը ընտրության էր եկել իր «ապագա քաղաքապետ թոռնիկի» հետ: «Առաջին լրատվական»-ի հետ զրույցում քաղաքապետն իր շանսերը «շատ բարձր» գնահատեց՝ հիմնավորելով, որ ջերմուկցին արդեն իսկ տեսել է իր աշխատանքը:
Նշենք, որ Վարդան Հովհաննիսյանը համարվում է ՀՀԿ-ի, ԱԺ պատգամավոր ՀՀԿ-ական Աշոտ Արսենյանի, Վայոց ձորի մարզպետի հովանավորյալը: Քաղաքապետից հետաքրքրվեցինք՝ ինչպիսի դերակատարություն կունենա այդ հովանավորությունը ընտրության ժամանակ: «Ես բազմիցս հայտարարել եմ, որ Արսենյանի հետ շատ մտերիմ ընկերներ ենք, և բնական է, որ ընկերը պետք է պաշտպանի ընկերոջը: Ինձ ընտրում է իմ ժողովուրդը, և ոչ թե հովանավորյալը: Իսկ Արսենյանն իմ ընկերներից մեկն է և պարտավոր է ինձ աջակցել:
Ես նաև ՀՀԿ տարածքայինի նախագահն եմ, և բնական է, որ կուսակցությունը պետք է ամեն ինչ անի, որ իր թեկնածուն բարձր ձայներով անցնի»,- ասաց քաղաքապետը:
Նշենք, որ Ջերմուկում քաղաքապետի պաշտոնի համար մրցակցում են երկու ընկերներ՝ գործող քաղաքապետը և անկուսակցական Կորյուն Ստեփանյանը: Նրանք, քաղաքապետի խոսքով, 30 տարվա ընկերներ են և ընտրությունից հետո էլ ընկերական հարաբերությունները կպահպանեն, եթե նա չխզի: Մինչ այդ, նշենք, առաջադրվել էր ևս մեկ թեկնածու՝ Ազատ Հովակիմյանը, որը, սակայն, ինքնաբացարկ էր հայտնել:
