Չնայած Հայաստանի ջերմոցային տնտեսությունների տերերի բազմաթիվ ակցիաներին, բողոքներին ու դիմումներին կառավարությանը, նրանց խնդիրները դեռ լուծում չեն ստացել: Քանի որ Հայաստանում գազի գինը բավական բարձր է, ջերմոցատերերը չեն դիմանում անհավասար մրցակցությանը և հեռանում են Հայաստանից: Խոսքը Թուրքիայից ներկրվող բանջարեղենի՝ հիմնականում լոլիկի մասին է, որը, ըստ ջերմոցատերերի, Հայաստան է ներկրվում կասկածելի որակով և ապօրինի ճանապարհով՝ առանց մաքսատուրքերի:
«Ինչ է նշանակում՝ արտագաղթել Արարատյան դաշտավայրից, բնակլիմայական նորմալ պայմաններ, բերրի հող, բայց մարդիկ նույնիսկ իրենց ջերմոցային տնտեսությունները թողնում, արտագաղթում են Ռուսաստան»,- «Առաջին լրատվական»-ին ասաց Արարատի մարզի Գեղանիստ գյուղի ջերմոցային տնտեսության տնօրեն Գագիկ Բաբախանյանը՝ հավելելով, թե հիմնական խնդիրն այսօր ոչ միայն ցածր կալորիականությամբ ու թանկ գազն է, այլև Թուրքիայից ներմուծվող լոլիկը, որը վաճառվում է հայկականի անվան տակ:
Մեր հարցին` ինչո՞ւ, իր կարծիքով, կառավարությունը չի կարողանում պայքարել դրսից լոլիկի ներմուծման դեմ, եթե դա ապօրինի է և ովքե՞ր են կանգնած դրա հետևում, գործարարն ասաց. «Ես չեմ կարող ասել` ովքեր են կանգնած դրա հետևում, անհատ մարդիկ են, թե օլիգարխներ են, բայց էդ կասկածելի ծագումով լոլիկը վաճառվում է հայկականի անվան տակ, թող տանեն անալիզ անեն տեղական ու թուրքական լոլիկը, տեսնեն որակը»: Ըստ ջերմոցատիրոջ՝ կասկածելին այն է, որ երկար ճանապարհ անցնելով թուրքական լոլիկը չի կորցնում տեսքն ու պնդությունը, ուստի չի բացառվում, որ այն քիմիական ազդեցության ենթարկված լինի: «Եվ դա վաճառվում է տեղականի անվան տակ: Ո՞վ է տուժում՝ տեղական արտադրողը»:
Մեր հարցին` ի՞նչ են իրենք առաջարկում, հայկական լոլիկը մրցակցություն չունենա, գները աճե՞ն: «Երբեք ես էդ կարծիքին չեմ, որ չներկրվի դրսից, ու հայկական լոլիկի գինը շատ բարձր լինի, նման բան դժվար թե տեղի ունենա, բայց համաձայն էլ չեմ, որ Թուրքիայից անորոշ ծագումով լոլիկ ներկրվի, ու անհավասար մրցակցություն ստեղծվի տեղական արտադրողների և դրսից ներմուծողների միջև»,- ասաց Բաբախանյանը:
Մոտ երկու տարի առաջ կառավարությունը հավանություն տվեց գյուղացիական տնտեսություններում ջերմոցային տնտեսության խթանման հայեցակարգին: Հայեցակարգի նպատակն էր պետական նպատակային քաղաքականության կիրառմամբ գյուղացիական տնտեսություններում մինչև 10 հազար մետր տարածք ունեցող ջերմատնային տնտեսությունների զարգացումը: Ըստ կառավարության՝ Հայաստանի տարածքում շահագործվում է ավելի քան 145 հեկտար ջերմատուն: Ընդհանուր ջերմատների և ջերմոցների մակերեսը կազմում է ավելի քան 500 հեկտար: Ըստ այդ հայեցակարգի՝ ջերմատնային տնտեսությունների զարգացմանն ու ընդլայնմանը խոչընդոտող գործոններն են ջերմատնային կոնստրուկցիաների ու ջերմատներում օգտագործվող սարքավորումների համար Հայաստանի Հանրապետություն ներկրելիս մաքսատուրքի կիրառումը և ավելացված արժեքի հաշվարկումը, նոր ջերմատան հիմնման և շահագործման թանկ լինելը, ձմեռային ամիսներին հայրենական արտադրության բանջարեղենի համեմատությամբ հանրապետություն ներկրվող բանջարեղենի ինքնարժեքի ցածր լինելը և այլն»:
Հայեցակարգն ընդունվել է, սակայն ոլորտի խնդիրները, փաստորեն, դեռ չեն լուծվել: Մեր հարցին` ի՞նչ լուծում է ստացել իրենց դիմումը կառավարությանը, Բաբախանյանը պատասխանեց, որ ժամանակ առ ժամանակ թուրքական լոլիկի ներկրումը դադարել է, սակայն հետո կրկին վերսկսել: «Հատկապես փոքր ջերմոցները չեն ստանում գոնե մինիմում եկամուտ: Հույս կա, որ նոր վարչապետը պիտի դառնա դեմքով դեպի գյուղացին, քանի որ ջերմոցային տնտեսություններն այսօր կանգնել են սնանկացման եզրին, վարկերի տոկոսադրույքները` բարձր, իրենց ունեցվածքը՝ գրավի տակ: Գյուղատնտեսության աճը հիմնականում վերաբերում է վերամշակող, արտահանող խոշոր ընկերություններին: Իսկ գյուղացին, կարող եմ ասել, աճ չունի վերջին տարիների ընթացքում»,- տեսակետ հայտնեց ջերմոցային տնտեսության տերը:
Հիշեցնենք, որ գազի թանկացմանը զուգահեռ` Հայաստանում գործող մի շարք ջերմատնային տնտեսություններ փակվեցին՝ «Սևան», «Աղավնատուն», «Դարակերտ» և մի շարք այլ ջերմոցային տնտեսություններ:
