Ճապոնական Softbank ֆիրման ստեղծել է ռոբոտ, որը կարող է մարդկային հույզեր ունենալ, հաղորդում է BBC-ն։
Ստեղծողների խոսքերով՝ Pepper (Պղպեղ) ռոբոտն օգտագործում է այսպես կոչված՝ հուզական շարժիչ և արհեստական ինտելեկտի համակարգ, որը թույլ է տալիս վերլուծել ժեստերը, ձայնային ազդանշանները և անգամ մարդու դեմքի արտահայտությունը։
Ինչպես պատմել են արտադրողները, մարդիկ կարող են շփվել անդրոիդի հետ այնպես, ինչպես շփվում են ընկերների կամ հարազատների հետ, ի դեպ՝ ռոբոտն ընդունակ է կատարելու տարբեր առաջադրանքներ։
«Երբեմն պակաս հուզական մարդկանց մասին ասում են, թե նրանք սիրտ չունեն, որ նրանք նման են ռոբոտի,- պատմել է Softbank-ի գործադիր տնօրեն Մասայեսի Սոն։ – Մենք առաջին անգամ մարդկության պատմության մեջ ստեղծել ենք ռոբոտ և սրտով, և հույզերով»։
Softbank-ը Pepper ռոբոտը մշակել է ֆրանսիական Aldebaran Robotics ընկերության հետ համագործակցությամբ։
