Մոսկվայում համերգի ժամանակ Կարլա Բրունին երգ է նվիրել իր ամուսնուն՝ Ֆրանսիայի նախկին նախագահ Նիկոլա Սարկոզիին: Ռուսաստանի մայրաքաղաքում «Տարվա լավագույն երգչուհի» մրցանակի արժանացած Բրունիի առաջին ելույթը Երաժշտության տանն անցել է անշլագով՝ հայտնում է ITAR-TASS-ը:
Բրունին կատարել է «նուրբ և պարզ երգեր առօրյա կյանքի մասին»: Հանդիսատեսը երգեր է լսել «սիրահարված աղջկա», «միայնության», «սիրեկանների», «սիրո», «այն մարդկանց մասին, որոնք գնացել են», «նրանց, ովքեր մեզ դուր չեն գալիս», «երազողների», «հաջողակ մարդկանց» մասին: Հենց այսպես է Բրունին երգերը ներկայացրել հանդիսատեսին:
«Իսկ հիմա ես կերգեմ իմ տղամարդու մասին: Ինչպես դուք գիտեք, նա բավական հայտնի է: Ահա թե ինչու եմ ես նրան երգում այլ անուն տվել՝ Ռեմո: Կարծում եմ՝ նրան սազում է այս անունը»,- ասել է Բրունին՝ առաջացնելով ամբողջ դահլիճի ծիծաղն ու երկար ծափահարությունները:
Երգչուհին ակտիվորեն շփվել է լսարանի հետ և շատ հաճախ՝ ռուսերեն: «Ի՜նչ հանդիսատես է: Ես սիրում եմ ձեզ»,- հիացել է Բրունին ջերմ ընդունելությամբ:
Հանրությունը դահլիճում նկատել է երգչուհու «առաջին երկրպագուին»՝ նրա ամուսին Նիկոլա Սարկոզիին, որը Ռուսաստան է մեկնել նրա հետ: Նախկին նախագահը ևս արժանացել է ծափահարությունների, ու ինքն էլ խոնարհվել է հանդիսատեսին:
Կարլա Բրունին Ռուսաստան է ժամանել իր առաջին համաշխարհային շրջագայության շրջանակներում:
