Տեղեկություն է տարածվել Սիրիայում ևս 3 ադրբեջանցու մահվան մասին, հայտնում է APA-ն՝ հղում անելով Սիրիայում կռվող ադրբեջանցի զինյալներին:
Ըստ տեղեկության՝ «Իրաքի և Լևանտի իսլամական պետություն» և քրդական «Դեմոկրատական շարժում» խմբավորումների միջև պայքարի հետևանքով Սիրիայի Ռասուլայն շրջանում առաջինները կորցրել են 10, երկրորդները՝ 70 մարդու:
Հաղորդվում է, որ «Իրաքի և Լևանտի իսլամական պետություն» զինված խմբավորման սպանված անդամներից 3-ն ադրբեջանցիներ են, նրանք հայտնի են Աբու Ջաֆար, Աբդու Շաքիր և Օսման մականուններով:
Սպանված ադրբեջանցիների մասին տեղեկություններ և լուսանկարներ դեռ չեն հրապարակվում:
Ադրբեջանցի զինյալները նաև չեն հայտնել սպանվածների իրական անունները, բայց APA-ին փոխանցել են նրանցից մեկի լուսանկարը:
Նշենք, որ Սիրիայում իրավիճակի սրումից հետո մի խումբ ադրբեջանցիներ տարբեր արմատական խմբավորումների կազմում մեկնել են այնտեղ և մասնակցել մարտերին: Այս ընթացքում մարտերում մոտ 100 ադրբեջանցի է զոհվել:
