ԱԺ ՀԱԿ խմբակցության քարտուղար Արամ Մանուկյանը մայիսի 30-ին խորհրդարանում 2013 թ. բյուջեի կատարողականի հաշվետվության քննարկման ժամանակ դիմեց մշակույթի փոխնախարար Արթուր Պողոսյանին՝ հիշեցնելով իրենց նախարարության առաքելությունը: Մանուկյանն ասաց, որ նախարարությունը պետք է Մարզահամերգային համալիրի հարցում կարծր դիրքորոշում ունենա և թույլ չտա արտաքին տեսքի փոփոխություն կատարել:
Փոխնախարարը պատասխանեց, որ այնտեղ ոչ մի ծրագիր չի իրականացվում, որ արտաքին տեսքում փոփոխություն լինի, ապա հստակեցրեց՝ եթե խոսքը մասնավորեցման մասին է, ապա իրենց գործառույթի մեջ մտնում է մշակութային օջախ հանդիսացող շենքի հետ կապված պաշտպանական պարտավորագրերի ստորագրումը: «Դա նշանակում է, որ այս սեփականատերը փոփոխություններ անելու իրավունք չունի, իսկ անելու դեպքում՝ նայած ինչ կարգի հուշարձան է՝ հանրապետական նշանակության, թե տեղական, պարտավոր է ստանալ որոշակի համաձայնություն»,- ասաց նա: Պողոսյանը նշեց, որ այս պահին որևէ տեղեկություն չունի, որ համալիրի տեսքը խեղումների է ենթարկվելու:
Մանուկյանը հակադարձեց՝ նշելով, որ փոխնախարարն, ամենայն հավանականությամբ, տեղյակ չէ. խնդիրը դա է, որ առուվաճառքի պայմանագրի մեջ հենց մշակութային բառն է հանած: «Ձեր ասածն ուժի մեջ է, եթե պայմանագրի մեջ նշվում է, որ վաճառվում է որպես մշակութային օբյեկտ, սակայն հենց այդ բառն է հանած, դրա համար եմ ես ուզում ձեր սկզբունքային, կարծր դիրքորոշումը, որ այդ տերմինը պայմանագրից չհանվի: Դա նայեք, և եթե իմ ասածը ճիշտ է, դրա դեմ կռիվ տվեք»,- ասաց նա:
Պողոսյանն էլ նշեց, որ ցանկացած մշակութային հուշարձանի կարգավիճակ որոշվում է ոչ թե դրա հետ կատարվող պայմանագրի ձևակերպմամբ, այլ Կառավարության կողմից հաստատված փաստաթղթերով: Նա նշեց, որ տեղյակ չէ կոնկրետ պայմանագրում տրվախ ձևակերպումներին, բայց կարծում է՝ անվիճելի է, որ Մարզահամերգային համալիրը հուշարձան է:
