Արմավիրի մարզի ընդհանուր իրավասության դատարանում Վահե Խալաթյանի նախագահությամբ սկսվել է Լևոն Համբարձումյանի գործի դատական քննությունը:
Ըստ մեղադրանքի՝ 58-ամյա Լևոն Համբարձումյանը Երևանի Մանանդյան փողոցի շենքերից մեկի բնակարանի սեփականության իրավունքի շուրջ տևական ժամանակ լարված փոխհարաբերությունների մեջ է եղել իր նախկին կնոջ՝ Օֆելյայի ամուսնու՝ Ռուդոլֆի հետ:
2013 թվականի հոկտեմբերի 11-ից 12-ն ընկած ժամանակահատվածում Լևոն Համբարձումյանը, առաջադրված մեղադրանքի համաձայն, Ռուդոլֆ Բաբայանի հասցեին սպանության, առողջությանը ծանր վնաս հասցնելու սպառնալիքներ է տվել, որոնցից վերջինս վախեցել է, դրանք իրականացվելու իրական վտանգ է զգացել:
2014 թվականի հունվարի 19-ին երկու անձանց՝ իր նախկին կնոջը՝ Օֆելյային, ու նրա ամուսնուն՝ Ռուդոլֆին առանձին դաժանությամբ՝ հրկիզելու եղանակով սպանելու դիտավորությամբ Լևոն Համբարձումյանը Երևան քաղաքից գնել է 3 լիտր բենզին, լցրել է 6 հատ ապակե տարաների մեջ:
Հունվարի 20-ի վաղ առավոտյան՝ 5-ն անց 30-ից ժամը 6-ի սահմաններում, Լևոն Համբարձումյանը վերցրել է բենզինով լի հիշյալ ապակե տարաները, գնացել է Ռուդոլֆ Բաբայանի բնակության վայր հանդիսացող՝ Արմավիրի մարզի Առատաշեն գյուղի Բաղրամյան փողոցում գտնվող վագոն-տնակի մոտ, որտեղ բենզին է լցրել վագոն-տնակի պատուհանների վրա, իր մոտ եղած լուցկիով հրկիզել է:
Բռնկված կրակից Օֆելյա Մովսիսյանը դուրս է եկել: Լևոն Համբարձումյանը բենզին է լցրել նախկին կնոջ վրա ու հրկիզել: Ռուդոլֆ Բաբայանն օգնության է հասել Օֆելյային: Լևոն Համբարձումյանը նրա վրա ևս բենզին է լցրել: Բռնկված կրակից Բաբայանն էլ է սկսել այրվել:
Այդ ժամանակ այրվող վագոն-տնակում է գտնվել նաև Լևոն Համբարձումյանի և Օֆելյա Մովսիսյանի դուստրը՝ Լուսինեն, ով օգնության է հասելայրվող մորն ու նրա ամուսնուն՝ Ռուդոլֆին:
Լուսինեն շտապօգնություն է զանգել: Օֆելյային ու Ռուդոլֆին այրվածքներով տեղափոխել են հիվանդանոց:
Հունվարի 22-ի երեկոյան ստացած վնասվածքներից Օֆելյա Մովսիսյանը հիվանդանոցում մահացել է:
Լևոն Համբարձումյանին մեղադրանք է առաջադրվել ծանրացուցիչ հանգամանքներում դիտավորյալ սպանության ու սպանության փորձի համար՝ ՀՀ քրեական օրենսգրքի 104 հոդվածի 2-րդ մասի 5-րդ կետով և 34-104 հոդվածի 2-րդ մասի 1-ին, 5-րդ կետերով:
Լևոն Համբարձումյանի խափանման միջոցը կալանավորումն է:
Որպես տուժողի իրավահաջորդ ճանաչվել է Լևոնի ու սպանված Օֆելյայի դուստրը՝ դեպքի ականատես Լուսինեն:
