Հովիկ Աբրահամյանի պատճառով 10 տարի շարունակ փողոցում հայտնված՝ Ամիրյան 4/4-ի բնակիչները հերթական անգամ հուսախաբ են եղել: Նրանց ապրիլ ամսվա կեսին խոստացել էին դրան հաջորդող 20 օրվա մեջ սկսել շինարարությունը և հաջորդ երկու ամսվա մեջ ավարտել այն:
«Ես կարգադրություն եմ ստացել առաջիկա 20 օրվա մեջ սկսել շինարարությունը, և հիմա մենք կազմակերպում ենք շինանյութի տեղափոխումը դեպի շենք: 20 օր հետո կարող եք գալ և անձամբ համոզվել, որ շինարարությունը վերսկսվել է»,- ապրիլ ամսին «Առաջին լրատվական»-ի հետ զրույցում ասել էր շինարարության տնօրեն Էդգար Մանուկյանը:
Իր բնակարանին սպասող բնակիչներից Վաչագան Թադևոսյանն այսօր «Առաջին լրատվական»-ի հետ զրույցում նշեց, որ առանձնապես տեղաշարժ չկա: Որոշակի շինաշխատանքներ սկսվել են, բայց ոչ իրենց բլոկում: «Խոստացված ժամանակին մենք գնացինք, բայց որևէ շինարարական աշխատանք էլ շենքում չէր կատարվում: Այս օրերին էլ որոշակի աշխատանքներ կատարվում են, բայց ոչ մեր մասնաշենքում, այլ Զաքիյան փողոցի մասնաշենքում, որտեղ տուժած բնակիչներից շատ քչերը տուն ունեն»,- ասաց մեր զրուցակից բնակիչը՝ հավելելով. «Իրենք այդ հատվածն են նորոգում, քանի որ այն անմիջապես կպած է հյուրանոցի տարածքին, իսկ իրենց ձեռք չի տալիս, որ հյուրանոցի հարակից տարածքը շինհրապարակ մնա: Բացի այդ, հենց այդ կորպուսի 8-րդ հարկում էլ Հովիկ Աբրահամյանի տղայի տարածքն է, նրա բնակարաններ են այնտեղ: Եվ այդ կոմունիկացիաները որ անցկացրել են, հենց դրա համար է: Եթե դա էլ չլիներ, այդ կորպուսն էլ այդպես կմնար»:
Բնակիչներին, սակայն, այս թեթև նորոգման աշխատանքները առանձնապես չեն ոգևորում: Դա, նրանց խոսքով, ընդամենը թոզփչոց է: «Երբ մենք նրանց հարցրինք, թե երբ են նորոգելու մեր հիմնական բլոկը, «պրարաբը» ձեռքը թափ տվեց, թե դա այս տարվա բան չէ»: Հուսահատ բնակիչներից մեկն անգամ գնացել է Հովիկ Աբրահամյանի մոտ և այս հարցով ընդունելություն խնդրել նրանից, սակայն վերջինիս աշխատակազմի ղեկավարն ասել է, որ Աբրահամյանը չի կարող ընդունել: Հորդորել է՝ նամակ գրեն բերեն:
Փողոցում հայտնված բնակիչներից ոմանք, հոգնլով այս քաշքշուկից, ցաբնկություն են հայտնել վաճառել իրենց բնակարանի տարածքը, սակայն այս հարցում էլ են խոչընդոտի հանդիպել: Շենքի սեփականատերերը չեն գնում այն՝ պատճառաբանելով, որ իրենց միայն գրասենյակային տարածք է պետք, բնակարանային տարածք անհրաժեշտ չէ: Իսկ որոշների դեպքում էլ համաձայնել են, սակայն ծիծաղելի ցածր գին են առաջարկել:
Մեր զրուցակից բնակիչները նշեցին, թե իրենք լսել են, որ Հովիկ Աբրահամյանը սեփականաշնորհել է հյուրանոցի ամբողջ տարածքը: «Երևի մի խաղ ուզում է խաղալ, բայց դեռ չենք հասկանում՝ ինչ»:
Հիշեցնենք, որ այս բնակիչները փողոցում են հայտնվել այն պատճառով, որ իրենց բնակարանների տարածքը պետական կարիքների համար վերցվել է իրենցից, իսկ տեղում կառուցվել է Hotel National հյուրանոցային համալիրը, որը պատկանում է Հովիկ Աբրահամյանին ու իր որդուն, և որը նրանք ժամանակին խլել են ԱԺ նախկին պատգամավոր, հանգուցյալ Մելիք Գասպարյանից: Այնուհետև հյուրանոցի հետնամասում շենք է կառուցվել, որտեղ բնակիչներին պետք է բնակարաններ հատկացվեին: Մինչ օրս այդ շենքի միայն պատերն են կանգուն, ներսում որևէ նորոգման աշխատանք չի կատարվել և չի կատարվում, դռներ և պատուհաններ տեղադրված չեն, անգամ վերելակ և կոմունիկացիաներ չկան: Եվ այս պարագայում մի քանի պատկան գերատեսչությունների կողմից, այդ թվում՝ Երևանի քաղաքապետ Տարոն Մարգարյանի, բնակիչներին ակտեր են տրվել, որ շենքի շինարարությունն ավարտված է, և այն պատրաստ է շահագործման:
