ՀՀԿ փոխնախագահ Ռազմիկ Զոհրաբյանը այսօր կուսակցության 15-րդ համագումարից առաջ «Առաջին լրատվական»-ի հետ զրույցում չհամաձայնեց այն դիտարկմանը, որ իրենց կուսակցությունը ավելի քան 15 տարի լինելով իշխանություն՝ ունեցել է բազմաթիվ ձախողումներ և չի կարողացել լուծել տնտեսական, սոցիալական և արտաքին քաղաքական խնդիրները: Նա գտնում է որ սոցիալ-տնտեսական վիճակը դեռ մի բան էլ բարելավվել է՝ 90-ական թվականների համեմատությամբ:
ՀՀԿ փոխնախագահը չհամաձայնեց նաև դիտարկմանը, որ իրենց կուսակցությունը վերջին տարիներին լուրջ փոփոխությունների է ենթարկվել և հեռացել է արմատներից:
Հիշեցնելով Սերժ Սարգսյանի այն հայտարարությունը, որ ինքն այլևս չի առաջադրվի որպես նախագահի թեկնածու, և եթե Հայաստանն անցնի խորհրդարանական կառավարման համակարգի, ինքը չի դառնա նաև վարչապետ՝ հարցրեցինք՝ արդյոք ՀՀԿ-ն քաղաքական դաշտում չի՞ զիջում իր դիրքերը: Ռազմիկ Զոհրաբյանը չհամաձայնեց նման հարցադրմանը՝ հիշեցնելով Սերժ Սարգսյանի մեկ այլ խոսք, թե ՀՀԿ-ն ծանրակշիռ ուժ է և կշարունակի իր դիրքերը պահպանել:
Ռազմիկ Զոհրաբյանի խոսքերով՝ հետագայում վարչապետ կարող է լինել իրենց կուսակցությունից մեկ այլ անդամ:
