Լեգենդար գլուխկոտրուկի ստեղծման 40-ամյակի կապակցությամբ Google որոնողական հսկան իր գլխավոր էջում սեփական լոգոտիպի փոխարեն ինտերակտիվ Ռուբիկ-կուբիկ է տեղադրել, հայտնում է hitech.vesti.ru-ն: Կուբիկի վրա սեղմելու դեպքում խաղը մեծանում է ամբողջ էկրանով մեկ, որից հետո օգտատերը կարող է մկնիկի օգնությամբ դրա ծայրերը պտտել տարբեր ուղղություններով, որպեսզի այն հավաքի:
Խոշորացույցի նշանի վրա սեղմելու դեպքում Google-ն օգտատիրոջը ցույց է տալիս որոնման պատուհան, որում նշված է «Կուբիկ Ռուբիկ» հարցումը, ինչը հնարավորություն է տալիս մի քիչ ծանոթանալու գլուխկոտրուկի պատմությանը:
Նրանց համար, ովքեր չեն որոնի Google-ում, hitech.vesti.ru-ն ներկայացնում է գլուխկոտրուկի կարճ պատմությունը: Այն 1974 թվականին մշակել է հունգարացի քանդակագործ Էռնե Ռուբիկը, որը ճարտարապետություն է դասավանդել: Այդ ժամանակից ի վեր Ռուբիկ-կուբիկը (կամ ինչպես սկզբում ինքն է այն անվանել՝ «Կախարդական խորանարդիկը») դարձել է աշխարհի ամենասիրված գլուխկոտրուկը: «Արտոնագրված» կուբիկների վաճառքի ծավալը գերազանցել է 400 մլնը: Ամեն տարի կուբիկի արագ հավաքման առաջնություններ են անցկացվում, յուրահատուկ գլուխկոտրուկի վրա են հիմնված գիտական շատ հետազոտություններ, իսկ հենց Ռուբիկ-կուբիկը վաղուց դարձել է մշակութային երևույթ:
