Դերասան Սերգեյ Դանիելյանը, անդրադառնալով ԱԺ Պատվավոր կոչումների մասին օրենքի ընդունմանը, նշեց, որ ԱԺ-ից որևէ ադեկվատ որոշում չի կարելի սպասել, հիմա հասել են արվեստագետներին: «Որքանո՞վ է իրենց հաճելի լինել ճիճուի կարգավիճակում»,- ասաց դերասանը:
Ըստ նրա՝ այն, ինչ տեղի է ունենում ՌԴ-ում, կապկում ենք, վերցնում ամենավատը, մինչդեռ կարելի է ՌԴ-ից լավ բաներ սովորել: «Պատկերացնո՞ւմ եք՝ Ֆելինին լիներ Իտալիայի ժողովրդական արտիստ, ծիծաղելի է: Միմիայն ճիճու լինելն է մեզ ստիպում նման բան անել»,- ասաց Սերգեյ Դանիելյանը:
Դանիելյանի կարծիքով՝ արվեստագետներին այս կոչումները տալով՝ լռեցնում ենք. «Թողեք՝ ամբողջ օրը հայհոյեն վարչապետից մինչև հավաքարար, վաստակավոր կոչում տալով՝ խեղճացնում ես, դարձնում պուճուր և գնում վերցնում, ձեռք սեղմում»: Ընդդիմադիր արվեստագետներին կոչում տալը նրանց «փչացնելու» ձև է:
Նա նաև նշեց, որ վաստակավորների մեջ կան մարդիկ, ովքեր ընդհանրապես իրենց մասնագիտության հետ կապ չունեն, ռուսներից կապիկի նման ընդօրինակում են:
«Այստեղ Մաշտոցից մինչև Արտավազդի վիզ, ամեն ինչ տալիս են իրար, Արտավազդի ո՞ր մասը տվեցին Ալլա Պուգաչովային, ով է տալիս, տեղի թայֆան իրար բաժանելով, դա՞ է խթանում ձեր արվեստը, որ Արտավազդի գլուխը տանես տուն»,-ասաց նա:
«Եթե մենք որոշել ենք ռուսների հետ համագործակցենք, ես իրականում դրան դեմ չեմ, Եվրասիական միություն մտնել, բայց դա չի նշանակում, պետք է դառնանք ճիճվի նման, չի նշանակում, որ եթե այնտեղ ժոցղովրդական է, այստեղ է պետք է ժողովրդական լինի: Արտիստը, ինչպես յուրաքանչյուր քաղաքացի, պետք է արժանապատիվ աշխատի, իր հացը վաստակի և արժանապատիվ ապրի»,-ասաց նա:
Նիկոլայ Ծատուրյանը դեմ չէ կոչումներին. եթե բոլորը ոհմակի նման հավասար են, չի կարող նման բան լինել:
«Արվեստագետների միջև չի կարելի սեպ խրել, ես որ ժողովրդական չեմ, ժողովրդական չե՞մ»,- հակադարձեց Սերգեյ Դանիելյանը:
Սերգեյ Դանիելյանն ասաց, որ ինքնասպան կլինի, եթե իրեն զանգահարեն նախագահականից և ասեն՝ եկեք մրցանակ ստացեք:
