Խոսելով խառնամուսնությունների մասին` այսօր «Զարկերակ» ակումբում հրավիրված մամլո ասուլիսի ընթացքում հոգեբան Կարինե Նալչաջյանն ասաց, որ խառնամուսնությունն այսօր լուրջ խնդիր է Հայաստանում:
«Այնքան էլ հակված չեմ դրամատիզացնել երևույթը, որովհետև ամուսնությունը անձնական շատ նուրբ հարց է՝ կապված զգացմունքների, սիրո հետ: Բայց այն, որ այս խնդիրն այսօր կա և զարգանում է՝ դա անտեսել չենք կարող, որովհետև լուրջ խնդիր է դառնում: Այն, որ հայ կինը նախընտրում է այլազգի ամուսնու` շատ պատճառներ ունի: Դրանցից մեկը Հայաստանում տղամարդկանց գործազրկությունն է կամ ֆինանսապես ոչ ապահովված լինելը: Մյուս պատճառը ցանկացած գնով արտասահման գնալու ցանկությունն է: Շատ դեպքերում ամուսնանալու միջոցով հնարավորություն են ստանում իրենց կյանքը դասավորել արտասահմանում, և կապ չունի, թե ամուսինն ինչ ազգի կլինի: Եթե ետ նայենք՝ Ցեղասպանության ժամանակ միայն այն պատճառով, որ հայ կինը զզվում էր օտար տղամարդուց, չէր ուզում, որ իրեն դիպչի՝ ինքնասպանություն էր գործում: Իսկ այսօր, երբ մահմեդական տղամարդն ամուսնանում է հայ կնոջ հետ, պարտադիր պայման է կնոջ կրոնափոխ լինելը: Այսինքն` հայ կինն այսօր նույնիսկ դրա առաջ չի կանգնում»,- նշեց հոգեբանը:
Ասուլիսի մյուս բանախոսը՝ քահանա Տեր Բաբկեն Հայրապետյանը նույնպես բացասաբար արտահայտվեց խառնամուսնությունների մասին` նշելով, որ եկեղեցին այսօր չի օրհնում նմանատիպ ամուսնությունները. «Մենք միանշանակ մերժում ենք և չենք օրհնում, բայց եթե նրանք դիմում են եպիսկոպոսին, Վեհափառին և ապացուցում են, որ ամուսնությունն իրոք սիրո վրա է հիմնված, որ այդ ամուսնության արդյունքում ազգային և կրոնական գաղափարները չեն տուժի` այդ դեպքում օրհնում ենք, բայց դա շատ հազվադեպ է լինում»:
Լուսանկարը՝ PanARMENIAN Photo-ի
