ԵՄ արտաքին քաղաքականության և անվտանգության հարցերով գլխավոր հանձնակատար Քեթրին Էշթոնը ողջունել է Խորվաթիայի, Մակեդոնիայի, Չեռնոգորիայի, Իսլանդիայի, Սերբիայի, Ալբանիայի, ինչպես նաև Լիխտենշտեյնի ու Նորվեգիայի` Բելառուսի դեմ ԵՄ սահմանած պատժամիջոցներին միանալու որոշումը:
«ԵՄ-ն ընդունում է ի գիտություն և հավանության է արժանացնում այդ պետությունների որոշումները»,- ասվում է Էշթոնի հայտարարության մեջ: Այս մասին հաղորդում է РИА Новости-ին:
ԵՄ 29 երկրների արտաքին քաղաքականության ղեկավարները հոկտեմբերի 15-ին կայացած նիստի ժամանակ որոշել են երկարաձգել Բելառուսի դեմ պատժամիջոցները մինչև 2013թ. հոկտեմբերի 31-ը:
Էշթոնը հերթական անգամ կոչ է արել Բելառուսին առանց բացառության ազատ արձակել բոլոր քաղբանտարկյալներին: Դրա հետ մեկտեղ բելառուսական իշխանություններին հանձնարարված է հրաժարվել քաղաքացիական հասարակության անդամներին, ընդդիմությանը վախեցնելու կամ հետապնդելու պրակտիկայից: Արտաքին գործերի ԵՄ խորհուրդը հայտարարել է բելառուսցի քաղաքացիների և քաղաքացիական հասարակության աջակցության մեծացման ջանքերի մասին, ինչպես նաև պատրաստակամություն է հայտնել բանակցություններ սկսել Բելառուսի հետ վիզաների տրամադրման գործընթացը հեշտացնելու համաձայնության վերաբերյալ:
ԵՄ արտգործնախարարները Մինսկին կոչ են արել հետևել Բելառուսում ԵՄ երկրների դիվանագիտական առաքելությունների արտոնություններին ու չխոչընդոտել նրանց աշխատանքի իրականացմանը:
