Ամերիկյան Apple կորպորացիան հնարավորություն ունի ըստ ԱՄՆ իշխանությունների հայտի՝ տալ ոչ միայն իր հաճախորդների նույնականացման տվյալները, այլև անձնական լուսանկարները, կապերի ցուցակը, նամակագրությունը, փաստաթղթեր և այլ տեղեկություններ: ITAR-TASS-ի հաղորդմամբ՝ այս մասին ասվում է ԱՄՆ իրավապահ մարմինների և իշխանությունների հետ աշխատանքի մասին Apple-ի նոր քաղաքականության մեջ:
Փաստաթղթում ասվում է, որ Apple-ը պահում է և կարող է ԱՄՆ իշխանությունների հայտի դեպքում փոխանցել Apple-ի արտադրանքի տիրոջ անունը, նրա ֆիզիկական և էլեկտրոնային հասցեները, հեռախոսահամարը, սարքի մասին տեղեկություններ և այն գնելու ամսաթիվը:
Բացի դրանից՝ եթե Apple-ի արտադրած սարքի տերն օգտվում է iTunes մեդիա փլեյերից կամ Apple Store առցանց խանութից, Apple-ը կարող է տվյալներ փոխանցել գնումների և կոնտենտի բեռնումների մասին, ինչպես նաև այն կրեդիտ-քարտի համարը, որով իրականացվել է գնումը:
Եթե հաճախորդն օգտվում է iCloud տվյալների պահպանման ծառայությունից, Apple-ը հնարավորություն կունենա ԱՄՆ իշխանություններին փոխանցել այդտեղի բոլոր տվյալները՝ լուսանկարներ, փաստաթղթեր, կապեր, օրացույցներ, iCloud փոստային ծառայության (դոմեններ՝ @icloud.com, @me.com և @mac.com) նամակագրությունը:
Apple-ը նաև նշել է, որ ընկերությունը հնարավորություն ունի տեղեկանալ Apple-ի սարքերից ուղարկված նամակներին: Սակայն FaceTime-ի և iMessage-ի դեպքում սա չի գործում, քանի որ այդ դեպքում տվյալները կոդավորված են փոխանցվում:
Apple-ն օգտատերերի մասին տեղեկություններ է տրամադրում դատարանի որոշման հիման վրա, բայց մի շարք դեպքերում դա կարող է լինել նաև առանց դատարանի վճռի՝ երբ վտանգված է մարդու կյանքը կամ առողջությունը:
Միևնույն ժամանակ, այսօր հայտնի է դարձել, որ ԱՄՆ Կոնգրեսի Ներկայացուցիչների պալատի իրավաբանական հարցերով կոմիտեն օրինագիծ է ընդունել, որը նախատեսում է ամերիկյան հատուկ ծառայությունների կողմից էլեկտրոնային հաղորդակցության տվյալների ներկայիս պրակտիկայի դադարեցում:
