Գործարար, Նավասարդ Կճոյանի սանիկ Աշոտ Սուքիասյանի արտահանձնման ձգձգումը բացառապես տեխնիկական խնդիրների պատճառով է: «Առաջին լրատվական»-ի հետ զրույցում ասաց դատախազության լրատվության և հասարակայնության հետ կապերի վարչության պետ Շահեն Տոնոյանը՝ հավելելով, որ այդ գործընթացն այլևս որևէ իրավական ընթացակարգից կախված չէ:
«Արտահանձնման որոշումը պաշտոնապես արդեն մտել է ուժի մեջ, որից հետո արդեն Վրաստանի արդարադատության նախարարը պետք է ստորագրի կայացված որոշումը, և դրանից հետո կկազմակերպվի արտահանձնման գործընթացը: Հիմա պարզապես արդարադատության նախարարի հաստատումն է ուշանում»,- ասաց Տոնոյանը:
Հիշեցնենք, որ ապրիլի 15-ին Թբիլիսիի կենտրոնական դատարանը բավարարել էր Աշոտ Սուքիասյանին Հայաստան արտահանձնելու միջնորդությունը: Դրանից հետո մեկշաբաթյա ժամկետում որոշման հետ որևէ միջնորդություն կապված չներկայացվեց, որոշումը չբողոքարկվեց:
Գործարար, Սուքիասյանի պատճառով սնանկացած Փայլակ Հայրապետյանի համար հասկանալի չէ արտահանձնման գործընթացի ձգձգումը: «Երբ զանգում են քննիչին, ասում է՝ դեռ չեն բերել: Այսպես սառեցված վիճակ է, ոչ մի նորություն չկա»,- ասաց Հայրապետյանը:
Նրա խոսքով՝ Սուքիասյանի արտահանձնումից հետո նախաքննական մարմնին առանձնապես անելիք չի մնում, քանի որ այս գործը պարզից էլ պարզ է: «Էս գործը բացահայտված գործ է: Ի՞նչ պետք է նորից բացահայտվի որ: Էդ տղային պետք է բերեն, որից հետո կանչեն նախկին վարչապետին, տերտերին, ինձ, բանկին ու պարզեն, թե ում է բանկը այդքան գումար տվել, որը պետք է ծախսվեր ՀՀ-ում 10 հազար աշխատատեղ բացելու վրա: Ու պարզեն նաև, թե ինչպես են էդ գումարները հայտնվել Տիգրան Սարգսյանի, տերտերի ու Աշոտի հաշիվների վրա: Առանձնապես բարդ բան չկա»,- հավելեց Հայրապետյանը:
Նա նաև նշեց, որ ինքը որևէ տեղեկություն չունի բանկում գրավադրված իր ամբողջ ունեցվածքի ճակատագրից: Հարցում է անում «Ամերիա» բանկին՝ հասկանալու համար, թե ինչն է մնացել, ինչը՝ վաճառվել, սակայն իրեն չեն պատասխանում:
Նշենք, որ վերջերս մամուլում հրապարակումներ եղան, որ ԱԺ պատգամավոր Մհեր Սեդրակյանը գնել է Գաջագործների 1/1 հասցեում գտնվող նախկին «Էրեբունի» միավորման տարածքը` «Ակվա Մարի լայթ» ՍՊԸ-ն: Հայրապետյանը, սակայն, գործարարներին հորդորում է բանկից ձեռք չբերել արգելանքի տակ գտնվող իր ունեցվածքը, քանի որ դատական գործընթաց կա, և հնարավոր է՝ այդ ամենը վերադարձվի:
Նշենք նաև, որ Աշոտ Սուքիասյանը մեղադրվում է առանձնապես խոշոր չափերի խարդախության (ՀՀ Քր. օր. 178-րդ հոդվածի 3-րդ մասի 1-ին կետ), խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու (184-րդ հոդ. 2-րդ մասի 1-ին կետ) և հանցավոր ճանապարհով ստացված առանձնապես խոշոր չափերով եկամուտներն օրինականացնելու (190-րդ հոդ. 3-րդ մասի 1-ին կետ) համար: Աշոտ Սուքիասյանը ձերբակալվել է այս տարվա հունվարի 31-ին Թբիլիսիում:
