Տնտեսական մրցակցության պետական պաշտպանության հանձնաժողովի նախագահ Արտակ Շաբոյանը համաձայն չէ այն դիտարկմանը, թե Հայաստանում մրցակցության բացակայությունը նաև կոռուպցիայի դրսևորում է:
Այսօր կառավարության նիստից հետո լրագրողները Շաբոյանից հետաքրքրվեցին, թե ի՞նչ կարծիք ունի կառավարության նիստում վարչապետի արած այն հայտարարությանը, որ նախագահի հանձնարարականով կոռուպցիայի դեմ պայքարի հարցում վիրահատական միջամտություններ կկատարվեն: «Էդ հարցերի հետ կապված որևէ մեկնաբանություն չեմ կարող տալ: Եթե մրցակցության և մեր ոլորտի հետ կապված հարցեր կան, խնդրեմ, համեցեք, պատրաստ եմ պատասխանել»,- ասաց Շաբոյանը:
Ըստ Շաբոյանի՝ Հայաստանում մրցակցությունը թույլ չէ, չնայած բազմաթիվ չլուծված խնդիրներ կան, որոնց լուծման ուղղությամբ աշխատանքները շարունակվում են:
Լրագրողի այն հարցին` եթե հայտարարվում է, որ մրցակցությունը թույլ չէ, ապա քանի՞ մարդ է շաքարավազ ներկրում, Արտակ Շաբոյանը պատասխանեց. «Քանի որ մեր ժամանակը սահմանափակ է… մենք ձեր հարցին պատասխանել ենք: Պատրաստ եմ հրավիրել բոլոր էն լրագրողներին, ովքեր հետաքրքրված են էդ հարցով և ևս մեկ անգամ պարզաբանումներ տալ»:
ՏՄՊՊՀ նախագահը նշեց, որ մեր օրենսդրությունը չի արգելում շուկաների կենտրոնացվածությունը և գերիշխող դիրքերի առկայությունը: Նրա խոսքով՝ հայաստանյան օրենսդրության համաձայն՝ պայքար է տարվում գերիշխող դիրքի չարաշահումների դեմ:
Ինչ վերաբերում է կենտրոնացվածության բարձր մակարդակին, ապա, ըստ Արտակ Շաբոյանի, այն ունի իր օբյեկտիվ հիմքերը` փակ ճանապարհներն ու փոքր շուկան:
«Մեր այս տարվա ուսումնասիրությունը ցույց տվեց, որ անցած տարվա համեմատ կենտրոնացվածությունը նվազել է: Եթե 13 շուկաներից 12-ը անցյալ տարվա ուսումնասիրությունների արդյունքում բարձր կենտրոնացվածություն ունեին, ապա այս տարվա մեր ուսումնասիրություններով (18-19 շուկա ենք ուսումնասիրել) մեծ մասը միջին կենտրոնացվածության են, կային նաև ցածր կենտրոնացվածության շուկաներ: Կենտրոնացվածության աստիճանի նվազում, այո, կա»,- նշեց նա:
Երբ լրագրողները հորդորեցին մի քանի օրինակներ բերել, որոնց դեպքում բարձր կենտրոնացվածության շուկաները վերածվել են ցածր կենտրոնացվածի, հանձնաժողովի նախագահը նշեց. «Հյութերի, երշիկեղենի, մակարոնեղենի շուկաները»:
Լուսանկարը՝ PanARMENIAN Photo-ի
