Արարատի և Վայոց Ձորի մարզերի ընդհանուր իրավասության դատարանում Ռոբերտ Պապոյանի նախագահությամբ սկսվել է Տիգրան Նազարյանի գործի դատական քննությունը:
Ըստ մեղադրանքի՝ Վայոց Ձորի Աղավնաձոր գյուղի 48-ամյա բնակիչ Տիգրան Նազարյանը հասկացել է, որ 2013 թվականի աշնանը հանձնած խաղողի դիմաց 2013 թվականի դեկտեմբերի 16-ին իր ստացած 552 հազար դրամ գումարով ի վիճակի չի լինելու ամբողջությամբ մարելու բոլոր պարտքերը:
Պարտատերերի կողմից պարտքերը մարելու պահանջի դեպքում նրանց առաջ արդարանալու, պարտքերի մարման ժամկետները հետաձգելու նպատակով Տիգրան Նազարյանը վնասել է իր տան դռան փականը, խառնել է տան իրերը, իր մոտ մնացած 390 հազար դրամը պահել է հողամասում, ապա ձևացրել, թե իր առանձնատնից գողություն է կատարվել:
Ըստ մեղադրանքի՝ անհայտ անձի կողմից իր առանձնատուն ապօրինի մուտք գործելու և 415 հազար դրամ գումար հափշտակելու վերաբերյալ Տիգրան Նազարյանը 2013 թվականի դեկտեմբերի 17-ին իրականությանը չհամապատասխանող սուտ հաղորդում է տվել ոստիկանության Եղեգնաձորի բաժնում:
Տիգրան Նազարյանին մեղադրանք է առաջադրվել հանցագործության մասին ակնհայտ սուտ հաղորդում տալու համար՝ ՀՀ քրեական օրենսգրքի 333 հոդվածի 1-ին մասով:
Նազարյանի խափանման միջոցը ստորագրությունն է չհեռանալու մասին:
Ամբաստանյալի խնդրանքով դատարանը նրան ապահովել է հանրային պաշտպանով:
Ցանկանալով «հնարամտություն» հանդես բերել ու «ֆինանսական» հարց լուծել, գյուղացին նոր ծախսերի մեջ է ընկել. եթե մեղավոր ճանաչվի, հնարավոր է, որ տուգանքի դատապարտվի, դռան փականն էլ ջարդել է, նոր փական պիտի առնի ու տեղադրի, տան իրերը խառնել է, հնարավոր է, որ ինչ-որ բան անզգուշաբար վնասած լինի: Հանցավոր արարքի համար դատվածությունն էլ, եթե Նազարյանը մեղավոր ճանաչվի, անտեղի բիծ կդառնա նրա կենսագրությանը:
