«Սիբիրախտի հարուցիչը մենք հայտնաբերել ենք հարկադիր մորթի ենթարկված մեկ կենդանու մսեղիքում, ոչ թե հիվանդ կենդանիների մեջ: Հաշվի առնելով այդ հանգամանքը՝ մեր ծառայությունն իրականացրել է ուսումնասիրություն, պրոֆիլակտիկ պատվաստումներ են իրականացվել: Այդ ընթացքում հարկադիր մորթ չի եղել»,- Հանրային հեռուստաընկերության «Հարցազրույց» հաղորդման եթերում ասել է ՀՀ գյուղատնտեսության նախարարի տեղակալ Գրիշա Բաղիյանը:
Նա տեղեկացրել է, որ Վարդենիսի Ծովակ եւ նրան հարակից 7 գյուղերում կենդանիները պատվաստվել են, որից հետո 14 օր չի թուլատրվում միսն օգտագործել: Պատվաստումից անցել է 13 օր: Միջոցառումներն իրականացվում են գյուղատնտեսության եւ առողջապահության նախարարությունների կողմից: Կարանտին է հաստատված, ինչը նշանակում է, որ այդ գյուղերում կենդանիների մսեղիք օգտագործելն արգելվում է:
Հայտնի է, որ սոցիալական ոչ ապահով վիճակում գտնվող գյուղացին հաճախ թաքցնում է անասնագլխաքանակը` նպաստից չզրկվելու համար, ինչի պատճառով անասունը չի պատվաստվում, ապա հիվանդնում է: Այս մասին խոսելով՝ գյուղնախարարի տեղակալը նշել է, որ արդեն երկու տարի է, որ գյուղացին չի կարող թաքցնել անասնագլխաքանակը, քանի որ հենց գյուղի անասնաբույժն է տվյալները ներկայացնում: Նրա հետ էլ գյուղացին չի կարող գործարքի գնալ:
Փոխնախարարը նշել է, որ հիվանդությունը վարակվածների մոտ արտահայտվել է մաշկային ձեւով, որն ամենաթեթեւն է: «Հիվանդությունը թույլ է մարդկանց մոտ, համաճարակ չի կարելի համարել»,- ասել է Գրիշա Բաղիյանը:
