ԱՄՆ-ն կշարունակի հակահրթիռային պաշտպանության համակարգերի գլոբալ կառուցումն Ասիայում, այդ թվում՝ Հարավային Կորեայում դրա օբյեկտների տեղակայումը: Այս մասին հայտնել է Պենտագոնի ղեկավար Լեոն Պանետան:
«Կորեայի Հանրապետությունն ու ԱՄՆ-ն շարունակում են հրթիռային պաշտպանության հարցերով երկխոսությունը՝ ապահովելու համար ԿԺԴՀ-ի կողմից հրթիռային սպառնալիքի դեմ համապատասխան պաշտպանություն: Մենք ձեռնարկում ենք ցանկացած քայլ, որն անհրաժեշտ է հնարավոր հրթիռային հարվածի դեմ վստահ պատրաստվածության համար: Մենք նոր խոսում էինք Ճապոնիայում TPY-2 ռադարային համակարգի տեղակայման մասին, մենք նաև շարունակում ենք երկխոսությունը տարածաշրջանում մեր ընկերների հետ նման հզորությունների հետագա զարգացման վերաբերյալ»,-ասել է Պանետան՝ Վաշինգտոնում հարավկորեացի գործընկերոջ հետ բանակցություններից հետո:
Պանետայի խոսքով՝ բանակցությունների ընթացքում երկու կողմերը համաձայնել են հակահրթիռային պաշտպանության հարցում համագործակցության շարունակման անհրաժեշտության հարցում:
«Մենք տարբեր պայմաններ ունենք դրա համար, սակայն համաձայն ենք այն բանին, որ նման համագործակցությունն անհրաժեշտ է: Մենք մտադիր ենք ձեռնարկել ամեն ինչ մեր նպատակների իրականացման համար»,- հավելել է ամերիկացի նախարարը:
Պանետան նշել է, որ ԱՄՆ-ն և Հարավային Կորեան նաև պայմանավորվել են շարունակել ԿԺԴՀ-ին «մանրակրկիտ հսկելը» և մտադիր են կանխել նրա կողմից բոլոր սադրանքները:
Իր հերթին, հարավկորեացի պաշտպանության նախարար Կիմ Գվան Չժինը նշել է, որ ԿԺԴՀ-ն նախկինի պես զգալի սպառնալիք է ներկայացնում տարածաշրջանի անվտանգության համար և շարունակում է նախապատրաստվել հրթիռային և միջուկային զենքի նոր փորձարկումների:
«Մենք անհանգստացած ենք, որ ԿԺԴՀ-ն շարունակում է փորձերի նախապատրաստվել, շարունակում է ուրանի հարստացումը, ինչպես նաև իրեն սադրիչ վարք է թույլ տալիս»,- ասել է Չժանը:
Գործընկերները նշել են, որ մտադիր են աշխատել կորեական խնդրի կարգավորման վրա միջազգային միջնորդների «վեցյակի» շրջանակում:
