Սիրիայի ընդդիմության գլխավոր կազմակերպություններից մեկը՝ Սիրիայի ազգային խորհուրդը, քննադատել է ԱՄՆ իշխանություններին, որոնք չեն ցանկանում ֆինանսավորել իրենց պայքարը Սիրիայի նախագահ Բաշար Ալ-Ասադի դեմ:
Ինչպես հաղորդում է թուրքական Hurriyet թերթը, ՍԱԽ ներկայացուցիչ Խալեդ Խոջան դժգոհել է, որ ապստամբները «ոչ մի ցենտ» չեն ստանում ամերիկացիներից, որոնք «ավելի վաղ աջակցություն էին խոստացել»: Նրա խոսքերով՝ Սիրիայում կռվող ապստամբները աշխատավարձ են ստանում միայն շնորհիվ Կատարի, ԱՄԷ-ի և Լիբիայի ֆինանսավորման:
Խոջան ավելացրել է, որ երկար ժամանակ աշխատավարձեր չէին վճարվում գումարի բացակայության պատճառով:
ՍԱԽ ներկայացուցիչը պատմել է, թե կոնկրետ ինչպես է ձևավորվում միջոցների բաշխման սխեման: «Գումարը ստանում են միասնական հրամանատարության ներքո վարչակարգի դեմ պայքարող բոլոր ապստամբական ջոկատները: Նման ձևով խթանվում է ապստամբների շարքերում կազմակերպվածությունը»,- պարզաբանել է նա:
Միասնական հրամանատարության ձևավորման մասին պայմանավորվածությունը ձեռք էր բերվել հոկտեմբերի 16-ին:
Agence France-Presse-ի տվյալներով՝ հրամանատարությանը ենթարկվող ջոկատների յուրաքանչյուր զինվոր ստանում է ամսական 150 դոլար, սակայն այդ թիվը կարող է փոխվել՝ կապված ընտանեկան վիճակի կամ մարտի դաշտում ցուցաբերած ակտիվության հետ:
